Астана қаласында «Silk Road Triathlon Series Astana 2026» аясында Азия кубогы өтті. Олимпиадалық стандартқа сай жалпы 51,5 шақырымға созылған (1,5 км жүзу, 40 км веложарыс және 10 км жүгіру) сайыста жетісулық ардагер спортшы, осыған дейін триатлоннан 6 мәрте «Темір адам» атанған Бақытжан Бектенов 65-69 жастағылар арасында 1-орын, ал 60 жастан асқандар ішінде 3-орын алды. Жеңімпазбен мерейлі сәттен кейін байланысып, шағын сұхбат ұйымдастырдық.
– Жарыстың деңгейі жөнінде айтып өтсеңіз, осыған дейін болған жарыстармен салыстырғанда қалай болды?
– Өте жоғарғы деңгейде өтті. Әр жарыстың өзіне сай ерекшелігі болады. Халықаралық статусы бар болғандықтан, нақты қанша елден қатысқандығын бiлмеймiн. Ал жас санаттары бойынша бір күннің өзінде 18-24 жастан бастап, әр 5 жас сайын, 65-69 жасқа дейін 195 спортшы қатысты.
– Биылдыққа қатысып отырған бұл нешінші жарысыңыз, алда қандай жарыстарға қатысуды жоспарлап отырсыз?
– Бұл екінші жарысым. Бұйыртса, биылғы маусымда енді 3-4 жарысқа қатысуды жоспарлап отырмын.
– Олимпиадалық қашықтықтағы үш кезеңнің қайсысы сіз үшін ең қиыны болды?
– Жалпы бұл қашықтық та, әр кезең де оңай емес. Өйткені жарыстың өзі күн шығып, айнала ысып кеткен сәтте (12:00-де) басталды.
– Ыыстық ауа райы жарыс тактикаңызға қалай әсер етті?
– Барлық қашықтықты бiр қалыпты өтуге тырыстым. Бар тактикам сол.
– Жарыс барысында есте қалған ерекше сәт болды ма?
– Соңғы кезеңде (жүгіру) iшетін судың өзi ып-ыстық болды.
– Өз нәтижеңізге қаншалықты көңіліңіз толды? Бұл нәтиже сіздің бұрынғы жетістіктеріңізбен салыстырғанда қандай орын алады?
– Триатлонда маңыздысы – мәреге жету. Ал орын алу – үлкен жетістік. Әр жеңістің орны ерекше.
– Жас ұлғайған сайын жаттығу әдістеріңізде қандай өзгерістер болды? Әлі күнге дейін жарыстарға қатысуға не ынталандырады?
– Мені iштегi намыс алға жетелейді. Шыдамдылықты талап ететін спорт түрі болғандықтан, соған сай еңбекті қажет етеді. Бастысы уақытпен қаражат. Өйткені 3 спорт түрі болғандықтан қажеттіліктеріне қарай дәріс жарнасы, жолға, жататын орын, спорттық бадтар, дәрумендерге ақша керек.
– «Жас — тек сан» деген сөзбен келісесіз бе? Неліктен? Қазақстандағы ардагерлер арасындағы спорттың дамуына қандай баға берер едіңіз?
– Иә, келiсем. Өйткені мен оптимиспiн! Ал ардагерлер арасындағы спорт мәселесіне келетін болсақ, ол – өте үлкен тақырып. Шешiлмеген мәселелер, кордаланган проблемалар бар. Оған мен арнайы сұхбат беруге дайынмын.
– Өзіңізбен отырып, кеңінен әңгімелесуге бізде дайынбыз. Ал жарыс арасында сұхбат бергеніңізге рақмет!
Серік ҚАНТАЙ
