Бас прокуратура қазақстандықтарға заңды сақтау мен әлеуметтік желілердегі ақпараттық гигиенаның маңыздылығы туралы ескерту жасады, – деп хабарлайды 7-su.kz ақпараттық порталы.
«Цифрлық қауесеттер» қаупі
Бас прокуратура қазіргі цифрлық кеңістікте «цифрлық қауесеттердің» таралуы негізгі қатерлердің біріне айналғанын атап өтті. Пайдаланушылар назар аударту мақсатында деректерді тексерместен, расталмаған мәліметтермен бөліседі, бұл ауыр салдарға әкеп соғуы мүмкін.
«Назар аударту мен «хайп» қуған жекелеген тұлғалар өз әрекеттерінің салдарын елемейді. Ал шын мәнінде, шындыққа сәйкес келмейтін ақпаратты жариялау бүкіл қоғам үшін қауіп факторы саналады. Бұл жай ғана зиянсыз әзіл немесе интернеттегі пікір емес. Мұндай әрекеттер дүрбелең туғызуы, азаматтардың іскерлік және жеке беделіне нұқсан келтіруі, сондай-ақ мемлекеттік институттардың қызметін тұрақсыздандыруы мүмкін», – деп ескертті ведомство.
Цифрлық із және жауапкершілік
Бас прокуратура интернетте толық анонимдік сақтау мүмкін еместігін еске салады. Қазіргі заманғы технологиялар ақпарат көздерін анықтауға мүмкіндік береді, ал заңға қайшы жарияланым авторлары заңға сәйкес жауапкершілікке тартылады.
«Сондықтан пікір немесе жазба жарияламас бұрын оның салдарын түсіну қажет. Жала жабу, қорлау немесе көрінеу жалған ақпарат тарату заң бойынша жауапкершілікке әкеп соғады», – делінген хабарламада.
Сөз бостандығы және тексерілген деректер
Сөз бостандығы бетімен кету дегенді білдірмейді, деді Бас прокуратурадағылар. Кез келген ақпарат болжамдарға емес, тексерілген деректерге негізделуге тиіс.
Бас прокуратура ақпаратынша, сөз бостандығы – шексіз еркіндік емес. Ол басқа адамдардың құқықтары мен заңды мүдделерін бұзуға сылтау бола алмайды.
«Бұл – ақпараттық этиканың негізгі қағидаты. Заң – әрбір азаматты қорғау тетігі. Құқықтық нормаларды сақтау тұрмыста, бизнесте және медиа кеңістікте қауіпсіз орта қалыптастырады», – деп толықтырды ведомство өкілдері.
Бас прокуратура өкілдері қылмыстық қудалау органдары тек жауапкершілік шараларын қолдануға ғана емес, ең алдымен құқық бұзушылықтардың алдын алуға бағытталғанын атап өтті.
