Текеліде қала тұрғындарының қатысуымен ерекше мазмұнға ие жүру марафоны өтті. Қонаев атындағы ең ұзын көшенің бойында өткен шараға жастар, еріктілер, қоғамдық ұйым өкілдері мен белсенді тұрғындар қатысып, 5 шақырымнан астам қашықтықты жаяу жүрді.
Референдумға орай ұйымдастырылған «Бірлік. Құқық. Болашақ» атты марафон жастардың құқықтық мәдениетін арттырып, қоғамдағы бірлік пен ынтымақты нығайтуға бағытталды. Таңғы таза ауамен басталған шарада қатысушылар бір бағытта қадам басып, ел болашағының негізі саналатын заң үстемдігі мен азаматтық жауапкершілік туралы ой бөлісті.
Марафон барысында жастардың көтеріңкі көңіл-күйі, ортақ мақсатқа деген ұмтылысы айқын байқалды. Әрбір қатысушы үшін бұл күн елдік құндылықтарды жүрекпен сезінудің бір сәтіне айналды.
– Маған бүгінгі күн ерекше әсер сыйлады. Іштей рухтанып, осы шараға белсене қатысып тұрмын. Жалпы жаяу жүріп бой сергіту адамның денсаулығына пайдалы. Қаламызда өтетін қоғамдық шаралардан қалыс қалған емеспін. Марафонға алғаш рет қатысудамын. Басты-сы, – көңіл-күйім көтеріңкі. Бұл жерден қаламыздағы көптеген белсенді жасты көріп қуандым, – дейді қала тұрғыны Жұлдыз Оразбек.
Ұйымдастырушылардың айтуынша, мұндай іс-шаралар жастардың бойында отансүйгіштік сезімді күшейтіп, ортақ құндылықтарды дәріптейтін алаң.
– Осындай игілікті бастамаға бейжай қарапмай, өз үлесімді қосқым келді. Жастардың белсенді болғаны, елдің болашағына деген сенімін нықтайды. Заңға құрмет көрсету – әр азаматтың борышы. Сондықтан халқымыздың болашағы үшін жасалатын әрбір игі бастаманы қолдауды жөн деп санай- мын, – дейді «Tekeli Jastary» филиалының жетекшісі Айым Әбзелбаева.
Медет ЖҰМАБАЙ
