Диқандар қазір жаз бойы маңдай термен өсірген өнімдерін жинап алу қамымен дала төсінде жүр. Биыл аудан бойынша ауыл шаруашылығы дақылдарын егуге 113 мың гектардан астам жер жоспарланған.Оның басым бөлігіне дәнді дақылдар себілді.
Күздік және жаздық бидай, арпа, сұлы мен жүгері алқаптары өңірдің егін шаруашылығында негізгі орын алады. Сонымен бірге, көкөніс-бақша өнімдері, майлы дақылдар, картоп және қант қызылшасы, мал азығы егілді. Қазір шаруалардың басты міндеті – бабымен күткен егінді ысырапсыз жинап алу.
Бүгінгі таңда дәнді дақылдардың басым бөлігі орылып, 211 мың тоннадан астам өнім қамбаға құйылды. Орташа түсім гектарына 22 центнерден асып отыр. Жүгері жинау да басталып, алғашқы өнім алынды. Картоп өсірушілердің де еңбегі ақталуда. Ауданда мың гектардан астам картоп жиналып, 27 мың тоннадан аса өнім алынды. Мақсары алқаптарындағы жұмыс та жалғасып, бірнеше мың гектардың өнімі қамбаға түсті.
Егін жинау – үлкен ұйымдастырушылықты талап ететін жауапты науқан. Бұл ретте шаруалардың қолындағы техниканың дайындығы ерекше маңызға ие. Биыл егін ору жұмыстарына жүздеген арнайы техника жұмылдырылып, комбайндар, астық тиегіштер, тазалағыштар мен тасымалдаушы көліктер науқанның үздіксіз жүруіне мүмкіндік беріп отыр. Күзгі дала жұмыстары да қатар жүргізілуде. Диқандар келесі жылдың берекесін бүгіннен ойлап, күздік бидай себуге кірісті.
Сүдігер жырту жұмыстары да белгіленген жоспарға сәйкес атқарылуда. Яғни, бір науқан аяқталмай жатып, келесі жылдың қамы жасалып жатыр. Егіннің бітік шығуы тек жер мен ауа райына ғана емес, қолданылған агротехнологияға да байланысты. Осы бағытта аудан шаруаларына минералды тыңайтқыштарды пайдалану жөнінде түсіндіру жұмыстары жүргізіліп, жоспарланған көлемнің едәуір бөлігі сатып алынды. Бұл – топырақ құнарын сақтап, өнімділікті арттыруға бағытталған маңызды қадам.
Диқандар үшін жанар-жағармай мәселесі де назардан тыс қалған жоқ. Көктемгі және күзгі дала жұмыстарына қажетті отын көлеміне шаруашылықтардан өтінімдер қабылданып, жеткізу жұмыстары ұйымдастырылуда. Бұл ауыл шаруашылығы техникасының науқан кезінде іркіліссіз жұмыс істеуіне мүмкіндік береді.
Ауыл шаруашылығының әлеуетін арттыруда техникалық жаңарудың орны бөлек. Биыл ауданда бірнеше жаңа ауыл шаруашылығы техникасы сатып алынып, оған қомақты инвестиция бағытталды. Оның бір бөлігі шаруалардың өз қаражаты болса, қалғаны несие есебінен алынған.
Кербұлақтағы бүгінгі көрініс – дала еңбегінің біркүндік емес, жыл бойы жалғасатын тынымсыз тіршілік екенін көрсетеді. Көктемде жерге себілген әр дәннің өтеуі күзде көрінеді. Ал бүгінгі жиын-терінмен қатар атқарылып жатқан күзгі жұмыстар өңір диқандарының келер жылдың қамын да қатар ойлап отырғанын аңғартады. Даладағы берекенің бастауы да осындай маңдай тер мен жүйелі еңбекте.
Айгүл БАЙБОСЫН
