Халық қалаулысы елімізде өлімнің өзі бизнеске айналғанын айтып, дабыл қағуда.
Бұл туралы 7-su.kz ақпарттық порталы inbusiness.kz сайтына сілтеме жасап хабарлайды.
Дәулет Мұқаевтың сөзінше, бұл – барып тұрған бизнес.
– Астананың Бас мешіті мен Хазірет Сұлтан мешітіндегі асханада ас берсеңіз, адам басына 20 мың теңгеге дейін төлеуге дайын болыңыз. Адам өліміндегі ас емес, той жасайтын дастарқан. Минималды баға – 7 мың теңге. Бірақ ол кезде етті өзіңіз әкелесіз. Бұл бизнес болмағанда не?! Мысалы, Шығыс Қазақстан, Абай, Павлодар облыстарында дастарқанда тек 7-ақ ас түрі болады. Одан басқа мәзір жоқ! Ұсынбайды! Неге бас қалада, басқа аймақтарда осылай болмайды?! – деп ашуланды ол.
Мәжілісмен қара жамылып, қайғыдан қан жұтқан отбасыға мұның едәуір салмақ екенін жауаптыларға ескертіп отыр. Ол «ысыраптың алдын алу мешіттерден басталса…» деген ойы барын ашық жеткізді.
– Ерте ме, кеш пе кез келген адам басына өлім келеді. Одан ешкім құтыла алмайды. Жер алу, жаназа, ас беру, зират көтеру… осының бәрі – бір күні алдыңыздан шығатын діни жоралғылар. Қазақстан мұсылмандар діни басқармасы тарапынан бұл мәселе дұрыс жолға қойылмаса, қайғыдан қан жұтып отырған жандарға, ақшасы жоқтарға одан сайын соққы болып отыр. Ысыраптың алдын алу неге мешіттерден басталмайды?! – деп сөзін қорытындылады депутат.
