Елдегі эпидемиологиялық жағдай пациенттерден Медициналық сақтандыру қорына түскен өтініштер мен шағымдар санына әсер етті. ӘМСҚ-ның ресми кері байланыс арналарына ағымдағы жылдың 6 айында 474 708 өтініш келіп түсті, олардың басым бөлігі түсіндірулер мен консультацияларға қатысты.
ӘМСҚ жеке және заңды тұлғалармен жұмыс жөніндегі департаментінің деректері бойынша көрсетілген кезеңде 455 мыңнан астам сұрақ қойылды. Оның 236 мыңы медициналық сақтандыруға жарналарды төлеу тәсілдеріне, 47 мыңнан астамы МӘМС жүйесіне қатысуға қатысты болса, қалғандарына жеңілдікті санатқа енгізу және сақтандырылу мәртебесін айқындау мәселелері жатады. Айта кетерлігі, Нұр-Сұлтан (100 мың тұрғынға 727,5), Алматы (100 мың тұрғынға 375,1), Шымкент (100 мың тұрғынға 162,1) қалаларынан сұрақтар басым болады.
2021 жылдың 1-жартыжылдығында халықтан барлығы 6552 өтініш түсті. Шағымдардың басым бөлігі медициналық көмек көрсетуден бас тарту (28%), көрсетілген медициналық қызметтердің сапасы (26,3%), ақпараттық жүйелерде нақты көрсетілмеген қызметтерді анықтау (10,5%), медициналық көмекті ұзақ күту (7%), дәрілік препараттармен қамтамасыз етуден бас тарту (6,6%) мәселелері құрайды.
Коронавирустық инфекциямен сырқаттанушылықтың өсуі кезеңінде Қордың жеткізуші медициналық ұйымдарында жоспарлы көмектің сапасы мен қолжетімділігіне халық шағымының өсуі байқалады. Ағымдағы жылдың 1-ші тоқсанында Қорға 2599 шағым түссе, 2-тоқсанда Қор қызметкерлері халықтан түскен 4056 шағымды өңдеді.
Егер медициналық ұйымда қызмет көрсету кезінде түсінік таба алмасаңыз, пациент ретінде өз құқығыңызды қорғау үшін қайда жүгіну керектігін еске салғымыз келеді. Ең алдымен медициналық ұйымның орнына, Пациентті қолдау қызметіне және ішкі сараптамаға жүгіну керек. Ол медициналық қызмет көрсетуді, олардың толықтығын және стандарттарға сәйкестігін бақылау үшін құрылған. Бұл қызмет медициналық ұйымның медициналық көмек көрсетуі мен клиникалық қызметіне ішкі талдау жүргізеді. Медициналық қызмет көрсету стандарттары мен тәртібінің бұзылуын анықтайды. Сондай-ақ азаматтардың өтініштерін, пациенттердің шағымдарын қараумен айналысады. Осы орайда ӘМСҚ жеке және заңды ұйымдармен жұмыс жөніндегі департаментінің директоры Забира Оразалиева:
– Медициналық ұйымдар пациенттерді қолдау және ішкі аудит қызметтерінің жұмысын реттеп, бекітілген халықтың қажеттіліктеріне жауап беруі керек. Бүгінгі таңда пациенттер өз медициналық ұйымдарында тиісті көңіл бөлмей, әлеуметтік медициналық сақтандыру қорына жүгіне отырып, өз құқықтарын қорғауды іздеуге мәжбүр, – дей келе әлеуметтік медициналық сақтандыру қорында кеңес алуға немесе шағым қалдыруға болатын бірнеше кері байланыс арналары бар екендігін айтады.
Шағымдар мен өтініштердің ең көп саны 8.00-ден 20.00-ге дейін қоңырау қабылдайтын 1406 Бірыңғай байланыс орталығы арқылы түседі. Бірінші жартыжылдықта 1406 желісіне 389 мыңнан астам сұрақтар мен шағымдар келіп түсті. Өтініштер санаты мен күрделілігіне қарай ақпаратты өңдеудің үш деңгейлі моделі бойынша қаралып, бөлінеді.
Бірінші деңгейге консультативтік сипаттағы мәселелер жатады. Екінші және үшіншіге егжей-тегжейлі зерттеуді қажет ететін өтініштер кіреді. Қор мамандары медициналық ұйыммен байланыс орнатып, ақпарат сұратады. Медициналық көмек көрсетуді немесе көрсетуден бас тарту себептерін тексереді.
Халық арасында қормен Qoldau 24/7 мобильді қосымшасы танымал (PlayMarket және AppStore-да орнатуға болады). Мұнда құжаттар қоса берілген мәтіндік форматтағы өтініштер жолданады. Әрі қарай өтінішке реттік нөмір беріліп, содан кейін өңдеу мәртебесі бақыланады. Жарты жыл ішінде Қор мамандары мобильді қосымша арқылы 82 мыңнан астам өтінішті өңдеді. Одан бөлек әлеуметтік медициналық сақтандыру қорының fms.kz сайтына да сұрақтар, шағымдар мен ұсыныстарды жібере аласыз. Сайттың басты бетінде баннерлер орналастырылған, олардан өтіп, өз өтінішіңізді қалдыра аласыз. Сайттың көмегімен 6 айда 2,5 мыңға жуық адам өз сұрақтарына жауап алды.
Өтініш берудің тағы бір мүмкіндігі Telegram-да Saqtandyrybot арқылы қарастырылған. «Негізгі мәзір» пәрменін басқаннан кейін таңдау үшін бірнеше бөлім бар. «1406-ға өтініш жіберу» дегенді таңдаңыз. Өтініш бот командаларына сәйкес беріледі, онда өңір, медициналық ұйымның атауы және мәселенің мәні көрсетіледі.
Қор тарапынан халыққа қызмет көрсету жұмыстарын жақсарту үшін жеткізушілерді ынталандыру бойынша жүйелі шаралар қабылдануда. Әлеуметтік медициналық сақтандыру қорының сарапшылары МӘМС пакетінде және мемлекет кепілдік берген тегін медициналық көмек көлемі бойынша жеткізушілер көрсететін қызметтердің сапасы мен көлеміне мониторингті жалғастыруда.
«Әлеуметтік медициналық сақтандыру қоры»
КЕАҚ облыс бойынша филиалы
