Мұқыры ауылының дәрігерлік амбулаториясы күрделі жөндеуден өткізіліп, қайтадан қолданысқа берілді. Емдеу мекемесі елді мекендегі 3387 тұрғынға қызмет көрсетеді. Жөндеу жұмысы биыл мамыр айында басталып, қазанда аяқталды. Құрылысты жүргізген мердігер «КазСтройСервис» жауапкершілігі шектеулі серіктестігі.
Іргетасы 1987 жылы қаланған мекемеге соңғы рет 2012 жылы күрделі жөндеу жүргізілген. Содан бері толық жөндеуден өтпеген ғимарат әбден ескірген еді. Мекемедегі мамандардың айтуынша, құбырлары ескіріп, жылу жүйелері жөндеуді қажет еткен.
Медициналық мекеме күніне 30 науқас қабылдауға арналған. Дәрігерлік амбулаторияның аумағы 263,7 ш.м., мұнда сырқаттарға алғашқы медициналық-санитарлық көмек көрсетіледі. Күндіз ем қабылдайтын 4 төсекті орын, лаборатория, жүкті әйелдерге арналған кабинет және екпе бөлмелері бар. Дәрігерлік амбулаторияда 1 жалпы тәжірибелі дәрігер, 1 акушер, 1 зертханашы және 4 орта буын медициналық қызметкер, 1 әлеуметтік маман жұмыс істейді. Күрделі жөндеуден өткен ғимараттың қайта ашылу салтанатында аудан әкімі Дәулет Халелов сөз алып, емдеу мекемесінде алғашқы медициналық көмек көрсетуге барлық жағдай жасалғандығын айтты. «Амбулаторияға күндіз ем қабылдайтын төсек-орын қойдық. Екпе жасау, зертханалық кабинеттерді жасақтадық. Ауыл тұрғындары игілігін көріңіздер. Сондай-ақ, ауданның 80 жылдығы мен Республика күні аталып өтеді. Барша қуанышпен ел-жұртты құттықтаймын», – деді аудан басшысы. Аудандық орталық аурухананың директоры Жаннұр Сырымовтың айтуынша, амбулаторияда тіс дәрігері, балалар бөлмесі бар. Ол биыл ауданда жаңадан 6 емдеу мекемесі пайдалануға берілгенін айтты. Бір әттеген-айы, ауданда невропатолог, окулист маман жетіспейді. Емдеу мекемесінің қайта пайдалануға берілгеніне қуанышын білдірген ауыл тұрғыны Данияр Оралбеков кең, жарық, жылы амбулаторияда ем қабылдауға барлық жағдайдың жасалғанын, арнайы аппарат та қойылғанына дән риза. Оның айтуынша, емхана күрделі жөндеуге жабылған кезде дәрігерлер ауылдың мәдениет үйінен кабинет алып,тұрғындарға қызмет көрсетулерін тоқтатпаған.
Мекемеге жаңадан келген дәрігер Арайлым Шаханбекова жұмысты қолға алып, сырқаттарды қабылдауды бастап кетті. Жас дәрігердің шипалы қолын сезінуге асыққан ауылдың үлкендері амбулаторияға келіп, тиісті ем-домын қабылдады.
Гүлжан ТҰРСЫН
Көксу ауданы
