Алматы облысы бойынша санитарлық-эпидемиологиялық бақылау департаменті басшысының орынбасары Асхат Чарапиев «Jetisy media» ақпараттық алаңында өткен брифингте короновирус және тұмауға қарсы вакцина салдыру жұмыстары қарқынды жүріп жатқандығын айтты. Бұл туралы «Жетісу» газетінің тілшісі хабарлады.
Жыл басынан бері облыста COVID-19-дың зертханалық расталған 47 833 жағдайы тіркелді. Ал алдыңғы аптамен салыстырғанда індет жұқтырғандар саны 17 пайызға төмендеген. Қазір облыс «жасыл аймақта». Десе де, Асхат Сәкенұлы коронавирус балалардан шығып жатқандығын айтты. Індеттің алдын алу үшін балаларға екпе салу жоспарда бар екенін, бірақ ата-анасының рұқсатымен ғана жүзеге асатынын айтты.
Жас құрамы бойынша сырқаттанғандардың жоғары үлесі 50 және одан жоғары жастағы адамдардың арасында 20 341, 30-39 жас аралығында 8374, 40-49 жас аралығында 7985, 14 жасқа дейінгі балаларда 6930, 20-29 жас аралығында 4203 жағдай тіркелген. Маман қазіргі жағдайға байланысты карантиндік режимнен шығудың кепілі коронавирустық инфекцияға қарсы вакцина салу және шектеу шараларының шарттарын қатаң сақтау екендігін жеткізді. Облысқа вакцинаның І-компонентінің 905 020 дозасы және II-компоненттің 895 150 дозасы келіп түскен.
Шара барысында департамент басшысының орынбасары облыста тұмауға қарсы иммундау жұмыстары жүргізіліп жатқандығын айтып, атқарылған жұмыстарды баяндады. Ағымдағы деректер бойынша тұмауға қарсы иммундаумен 219 378 азамат қамтылған. Тұмауға қарсы профилактикалық егудің төмен көрсеткіштері Панфилов, Ескелді, Талғар, Ұйғыр, Көксу, Жамбыл, Қаратал, Райымбек аудандарында және Талдықорған мен Текелі қалаларында екен.
Айдар ҚАЛИЕВ
Алматы облысы
