Қазіргі уақытта медициналық тәжірибеде бір реттік шприцтерді кеңінен қолдану бұлшықет ішіне және тері астына инъекция салуды едәуір жеңілдетті. Дегенмен, инъекциядан кейінгі асқынулардың жиілігі және оларды емдеу әлі де өзекті мәселелердің бірі. Инъекцияның көбеюімен қатар одан кейінгі асқынулардың саны да артып келеді.
Инъекциядан кейінгі барлық асқынуларды 3 топқа бөлуге болады:
1.Асептика ережелері бұзылған кездегі асқынулар;
2. Иньекцияны орындау техникасы бұзылған кездегі асқынулар;
3.Аллергиялық реакциялар мен ұзақ мерзімді асқынулар.
Асептика ережелері бұзылған кездегі асқынуларға тоқталып өтейік:
Инфильтрат – тері астына және бұлшықет ішіне енгізгеннен кейінгі ең жиі кездесетін асқыну.
Абсцесс – жұмсақ тіндердің іріңді қабынуы. Абсцесстердің пайда болу себептері инфильтраттармен бірдей. Бұл жағдайда асептикалық ережелерді бұзу нәтижесінде жұмсақ тіндердің инфекциясы пайда болады. Инъекция орнында абсцесс басталатынын көрсететін белгілер – инъекция орнының ісінуі, терінің қызаруы, пульсирленген және тұрақты ауырсыну. Абсцесстің алғашқы белгілері пайда болғаннан бастап дәрігерге жүгіну керек, өз бетінше ыстық немесе суық компресстерді қолдануға, ауырған ісінуді ысқылауға немесе уқалауға болмайды.
Флегмона – май талшықтары мен жасуша кеңістігінің жедел іріңді қабынуы.
Сепсис – инфекция ошағынан қанға патогенді микробтардың немесе токсиндердің түсуінен туындаған жұқпалы ауру. Сепсистің қоздырғышы көбінесе стафилококк, стрептококк немесе олардың комбинациясы.
Инъекциядан кейінгі асқынулардың пайда болуының негізгі себептерінің бірі асептика ережелерін бұзылуы. Асқынулардың санын азайту үшін: шығын материалдарын, инъекцияға және манипуляцияның басқа түрлеріне қолданылатын медициналық мақсаттағы бұйымдарды сапалы дезинфекциялау мен зарарсыздандыруды қамтамасыз ету. Медицина қызметкерлерінің қол гигиенасы техникасын сақтау, инъекция алдында науқастың терісін антисептикалық өңдеу, емдеу бөлмелерінде, егу бөлмелерінде, манипуляция бөлмелерінде санитарлық-эпидемиологиялық режимді сақтау, өндірістік және зертханалық бақылауды жүзеге асыра отырып аурудан сақтануға болады.
Алия НҰРТАЕВА
Жетісу облысы СЭБД ауруханаішілік инфекцияларды қадағалау бөлімінің бас маманы
Фото: ic-tuebingen.de
