«Jetisý media» ақпарат алаңында Әлеуметтік медициналық сақтандыру қорының облыстағы филиалы директорының орынбасары Нұрлан Отарғалиев биылғы жылдың жарты жылында атқарылған жұмыстардың қорытындысы жайлы айтып берді.
Бүгінде облыстағы филиалмен 81 медициналық мекеме шарт жасасқан (Оның 35-і жекеменшік ұйым). Жыл сайын жеке сектордың үлесі өсіп, бәсекелестік артып, барлығы сапаға жұмыс істеуде. Бұл өз кезегінде тұрғындардың жақсы клиника таңдауына мүмкіндік береді. Қордың ресми сайтында (Fms.kz) облыс бойынша медициналық қызмет көрсететін мекемелер тізімі толық жазылған.
– COVID-19 таралуының алдын алу мақсатында іс-шараларды қаржыландыруға биылғы жылдың 1-ші тоқсанына қарастырылған бюджет сомасы 8,94 млрд. теңге. Оның ішінде тегін медициналық кепілдендірілген көмек көлемі (ТМККК) аясында 7,71 млрд. теңгені, МӘМС аясында 1,23 млрд. теңгені құрады. Ал амбулаториялық-емханалық көмек деңгейінде препараттарды сатып алуға 10,2 млрд. теңге қарастырылған. Оның ішінде тегін медициналық кепілдендірілген көмек көрсету шеңберінде 7,66 млрд. теңге және Міндетті әлеуметтік медициналық сақтандыру пакеті аясында 2,6 млрд. теңге жоспарланған.
Алматы облысының тұрғындары арасында медициналық сақтандырумен қамтылған халықтың пайыздық үлесі 77,2% болып отыр, бұл шамамен 1,6 млн. адам. Облыстың 460 мыңнан астам тұрғыны МӘМС жүйесінен тыс қалып отыр.
Қор жұмысының басты бағыттарының бірі – халықпен кері байланыс орнату және пациенттердің құқықтарын қорғау. Ресми қызмет көрсету орындарына 15 177 өтініш түсті. Өтініштердің негізгі үлесі түсіндіру мен консультацияларды талап ететін мәселелерге тиесілі, – деді өз сөзінде Нұрлан Отарғалиев.
Қали АСҚАР
