Мемлекет басшысының Қазақстан халқына Жолдауын іске асыру аясында елімізде денсаулық сақтау саласындағы 30-дан астам ақпараттық жүйе оңтайландырылып, бірыңғай цифрлық платформаға біріктіріледі, – деп хабарлайды 7-su.kz Үкіметтің баспасөз қызметіне сілтеме жасап.
Жаңа бастама дәрігерлердің әкімшілік жүктемесін азайтып, медициналық қызметтің тиімділігін арттыруды көздейді.
Үкіметтің мәліметінше, цифрлық жүйелерді біріктіру бірыңғай дерекқор құруға, мәліметтерді қолмен енгізу қажеттілігін жоюға және дәрігерлердің уақытын үнемдеуге мүмкіндік береді. Нәтижесінде медицина қызметкерлері құжаттармен әуре болудың орнына науқастарға көбірек көңіл бөле алады.
Қазіргі таңда Денсаулық сақтау министрлігінің қарамағында 30-дан астам ақпараттық жүйе бар. Бұл өз кезегінде медицина қызметкерлеріне қолайсыздық туғызуда.
Дмитрий Мун, сала өкілі:
«Бүгінгі таңда дәрігерлер бір жүйеге дәрі-дәрмектерді енгізіп, екінші жүйеге кіріп, өз аккаунты мен құпия сөзін теруі қажет. Бұл көп уақыт алады және қолданыстағы процесті қиындатады», – деді ол.
Жобаны жүзеге асыру қазірдің өзінде басталған. Жыл соңына дейін жеті жүйе бірыңғай платформаға көшіріледі.
