Қазақстан кәсіпқой бокс федерациясының (ҚКБФ) президенті Рахымжан Ерденбеков алғаш рет Жәнібек Әлімханұлының допинг-сынамасына қатысты істің мән-жайын егжей-тегжейлі баяндады, – деп хабарлайды 7-su.kz ақпараттық порталы
АҚШ-тағы VADA ұйымынан келген 34 беттен тұратын сараптама қорытындысында Жәнібек Әлімханұлының В сынамасы расталған. Бұл туралы Қазақстан бокс федерациясының өкілі Рахымжан Ерденбеков мәлімдеді.
«Қазіргі таңда Жәнібекке қатысты юрисдикцияны біздің федерация өз қолына алды. Өйткені ол – федерациямыздың лицензияланған боксшысы. Сонымен қатар оның қатысуымен өткен соңғы бокс кеші Астанада, біздің санкциямызбен ұйымдастырылды. Қазір басты мәселе – ол бұл затты әдейі қабылдады ма, жоқ па? Оның ағзасына қалай түсті? Әзірге осы сұрақ ашық күйінде тұр», – деді бокс федерация өкілі.
Оның айтуынша, 19 қаңтарда өткен тыңдауда Әлімханұлының ісін тәуелсіз сарапшылар мен ҚР Туризм және спорт министрлігінің өкілдері қараған. Тыңдау халықаралық спорт құқығы стандарттарына сай, спортшының кінәсіздік презумпциясын сақтай отырып өткізілуде.
«Жәнібекке көптеген сұрақ қойылды. Сәуір айынан бері біз оның осы заттар анықталғанға дейінгі бүкіл өмір жолын тыңдадық. Кеше мен қазір жариялай алмайтын жаңа деректер белгілі болды. 23 қаңтарда тыңдауды жалғастырамыз», – деді Ерденбеков.
