Талдықорғанға арнайы іссапармен республикалық «Елім үшін егілемін» коронавирустық пандемиямен күрес жөніндегі азаматтық штаб өкілдері келіп, бірқатар мекемелерді аралап, COVID-19 жағдайы және вакциналау мәселесі бойынша түсіндірме жұмыстарын жүргізді.
Індеттің алдын алу жұмыстары бойынша ой бөліскен штаб мүшелері әуелі Журналистер үйінде брифинг өткізді. Шара барысында «Ел үшін егілемін» коронавирустық пандемиямен күрес жөніндегі азаматтық штабының мүшесі Серік Беркамалов:
– Тамыз айында Қазақстанда коронавирус пандемиясымен күрес жөніндегі «Ел үшін егілемін» тәуелсіз белсенділер бірлестігі Азаматтық штабы құрылды. Міндеті – халыққа кеселдің алдын алу бағытында түсіндіру жұмыстарын жүргізу, жұртшылықты екпе алуға шақыру. Ұжымдық иммунитетті қалыптастыру үшін халықтың 70-80 пайызы вакциналану керек. Біз COVID-19-дан ауру мен өлім-жітімді азайту үшін барымызды салып жұмыс істеп жатырмыз. Халыққа вакциналау қажеттілігі туралы қолжетімді ақпарат алуға көмектесуге дайын белсенділер арасында танымал медицина мамандары, кәсіпкерлер, азаматтық белсенділер, қоғам қайраткерлері мен сарапшылар бар, – дей келе осы уақытқа дейін атқарылған жұмыстарын баяндап, мониторингтік топтардың өткізген іс-шаралары жайлы толық мәлімет берді.
Спикер бүгінде 7 млн.-нан астам адам екпе алғанын, ұжымдық иммунитетті қалыптастыру үшін кемінде 10 млн.тұрғын екпе алу керектігін жеткізді.
Баспасөз мәслихатында Санитариялық-эпидемиологиялық бақылау комитетінің ресми өкілі Ержан Байтанаев, «Қоғамдық бақылау және мониторинг» республикалық қоғамдық бірлестігінің басшысы Саида Таукелева еліміздегі және облысымыздағы соңғы мәліметтерді келтіре отырып, екпе алудың маңыздылығына тоқталды.
Естеріңізге сала кетейік, пандемия басталғаннан бері облысымызда 52998 зертханалық расталған КВИ жағдайлары тіркелген. Оның ішінде 39034 жағдай симптом белгілерімен. Облыс бойынша коронавирустық инфекцияның өсу қарқыны соңғы аптада 0,3 пайыздан 0,2 пайызға төмендепті.
Десе де, штаб белсенділері елімізде вакциналау қарқыны төмен дейді. Мәселен, шілде айының ортасында тәулігіне 130 мыңға дейін адам екпе алса, қазір небәрі 30 мың қазақстандық иммундалуда. Ал республика бойынша облысымыз екпе алудан біршама қалып қойыпты. Соңғы айда облыста бірінші компонентпен вакциналау 64 пайыздан 70 пайызға ғана өскен. Ал жалпы республикалық көрсеткіш 8,5 пайызға артты.
Соңында жиынға келген жұртшылық штаб мүшелеріне «Балаларға вакцина салына ма?», «Екпе алғаннан кейін жағымсыздық туындаса не істейміз?», «Адамдарға плацебо қояды ма?» деген сияқты көкейде жүрген сауалдарын қойып, тұшымды жауап алды. Сөз арасында балаларға екпе тек ата-анасының рұқсатымен ғана салынатыны айтылды.
Айдар ҚАЛИЕВ
Алматы облысы
