Журналистер үйінде ҚР Денсаулық сақтау министрі Ақмарал Әлназарованың қытысуымен баспасөз мәслихаты өтті.
Басқосуды облыс әкімінің орынбасары Марлен Көлбаев жүргізді.
Министр бұқаралық ақпарат құралдары өкілдері тарапынан қойылған барлық сұраққа жауап беріп, тұщымды ойымен бөлісті. Баспасөз мәслихатына шақырылған зейнеткерлер де өздерінің пікірлерімен бөлісіп, мазалаған сұрақтарына жауап алды. Ақмарал Шәріпбайқызына жолданған сауалдардың басым бөлігі денсаулық сақтау саласындағы маман тапшылығына байланысты болды. Осыған ретте Бас дәрігер кадр жетіспеушілігін болдырмау мақсатында атқарылып жатқан жұмыстар туралы қысқаша әңгімелеп берді.
Айтуынша,бұл мәселе бүгінде өткір әрі өзекті тақырыптардың бірі. Қазір елімізде 4 мыңнан аса дәрігер жетіспейтін көрінеді. Десе де соңғы 3 жылда маман тапшылығы 21 пайызға төмендеген. Президенттің биылғы тапсырмасына сәйкес, мамандарды әлеуметтік қолдау жөніндегі Заңға қол қойылған. Осының аясында аудан орталықтары мен ауылды жерлерге баратын тапшы ақ халаттыларға төменгі жалақының жекеленген көрсеткіші бойынша тиісті әлеуметтік бірреттік берілетін қосымша көмек беру жұмыстары атқарылуда. Бұл бастама 19 сәуірден бастап күшіне енген. Осыған байланысты Жетісу облысында бүгінгі күнге дейін 27 дәрігер көмек алып үлгерген.
Бұған облыстық бюджеттен қосымша 170 миллион теңге қаражат қарастырылыпты. Сонымен бірге елдімекендерге қосымша көмек алып, 3 ай тұрақты қызмет атқарған жас дәрігер одан әрі сол барған жерінде тағы 5 жыл жұмыс істеуі тиіс. Қазіргі таңда оқу бітірген дәрігерлердің алғашқы жұмыс істейтін орнына жолдамамен баруы әлі де төмен. Сол себепті Денсаулық сақтау министрлігі бұл мәселе бойынша тәртіпті қатаңдату іс-шараларын қабылдамақ. Мемлекет тарапынан берілетін гранттар мен қосымша көмек саны ұлғаюда.
Ақмарал Шәріпбайқызына жолданған сауалдардың қатарында аталған министрлік пен БАҚ өкілдері арасындағы байланысты күшейту, денсаулық саласындағы білім сапасының әлі де көңіл көншітпейтіні, дәрі-дәрмек бағасының қымбаттығы, жалақының аздығы мәселелеріне қатысты ой-пікірлер қозғалып, ой қорытылды.
«Жетісу-Ақпарат»
