Апта соңында «Іле- Алатау» мемлекеттік ұлттық табиғи паркінің Қаскелең шатқалында Қазақстан Республикасының скайраннинг федерациясының ұйымдастыруымен «Sky Run Fest 2016» деп аталатын тұңғыш фестиваль болып өтті. Оған Алматы қаласы мен облысындағы осы спорт түрін ұнататын әуесқойлар қатысты.
Шынын айтсақ, алғашында таныс емес ағылшын сөзі нені аңғартатынын түсіне алмай, сан-саққа жорыған едік. Шақыру қағазында жазылған «биіктікке жүгіру» деген анықтама да мәселенің мәнісін аша қоймаған. Сондықтан шараны өз көзімізбен көру үшін Қарасай ауданында орналасқан шатқалға арнайы аттандық. Осы жерде қонақтарды қарсы алып, орналастырып жүрген ұйымдастырушылардың бірі – Регина Хайбуллина шараның мән-мағынасын түсіндіріп берген. Скайраннинг біздіңше айтқанда арнайы дайындалмаған, жолдары жасалынбаған тау шатқалдарымен биікке қарай жүгіру екен. Яғни, бұрын табиғатты, тауды сүйетіндер өз беттерімен жүгіретін болса, енді «Скайраннингпен айналысып жүрмін» деп жұмбақтап айтуына болады.
Жалпы, жер жаннаты Жетісу өлкесінің қай пұшпағы да көркем, тамаша емес пе? Соның ішінде Қаскелең шатқалы қараса көз тоймайтын табиғатымен, жанға шипа таза ауасымен, күркірей аққан Ақсай өзенімен ерекшеленеді. Скайраннингтен тұңғыш фестивальді ұйымдастырушылар жан-жағын биік шоқылар қоршап, өзеннің аңғарын жасыл желек көмкерген тамаша алаңқайды таңдапты. Мұнда фестиваль қонақтарына арнап палаткалы ауыл тігіліп қойғанымен келушілердің көпшілігі өздерінің жиналмалы шатырларын орнатып, әп-сәтте қызылды-жасылды мекен пайда болып үлгерген.
Өзінің отбасымен келіп, кішкене ұлымен шатыр тігіп жатқан Арман Ермұханбетов деген азаматты сөзге тартқан едік:
– Мектепте оқып жүргенімізде, содан кейін де достарымызбен жиналып тауға шығатынбыз. Бүгінде олардың көпшілігі тіршілік қамымен жан-жаққа кеткен. Ал мұндай демалысты көпшілікпен бірге өткізген әлдеқайда қызықты емес пе? Сондықтан Скайраннинг федерациясының осы фестивальді ұйымдастырып жатқанын ғаламтордан біліп, хабарластық. Енді, міне, зайыбым Қарлығаш пен ұлым Алдиярды алып, осы жерге келіп отырмыз. Ұнаса федерация мүшесі болуға дайынбыз.
– Мен бұрыннан жүгіруді ұнататынмын, – дейді екі баласы мен сіңлісін ертіп келіп, өздерінің шатырларына орналасқан Айнұр Ғабдуллина. – Алматы марафонына, ультрамарафонға жыл сайын қатысып тұрамын. Ал скайраннинг дегеніміз тек спорт емес, бұл табиғат аясында тамаша демалу да. Бұл, ең алдымен, салауатты өмір салты. Міне, сондықтан біз осы жердеміз.
Бұл күні фестивальдің салтанатты ашылу рәсімі өтіп, содан кейін қатысушылар түрлі мерекелік шаралар мен командалық жарыстар өткізген. Кешке қарай алау оттың жанында тамақтанып, соңынан тауда жүгірудің ережелері мен қауіпсіздік шаралары туралы түсініктеме берілді. Ал ұйықтар алдында қонақтарға арналып тақырыптық фильм де көрсетілді. Ертеңіне таңғы астарын ішкен қонақтар топ-топқа бөлініп, табиғатқа сапар шекті. Кішкене балаларымен келгендер үшін жеңілдеу маршрут таңдалса, ересектер өздерін ауыр бағытта сынап көрді. Қауіпсіздік шаралары жан-жақты қамтамасыз етілгендіктен көпшілік тамаша демалып, тау шатқалдарын бағындырып, аман-есен лагерьге оралды.
Қауіпсіздік демекші, фестивальдің ешқандай тосын оқиғасыз, қалыпты өтуі үшін Қарасай ауданының әкімдігі жол-патруль полициясын, «Жедел жәрдем» бригадасын және төтенше жағдай қызметін де ұйымдастырыпты. Ал табиғатты ластамау мәселесін «Іле-Алатау» мемлекеттік ұлттық табиғи паркінің қызметкерлері қадағалап отырды.
«Қолда барда алтынның қадірі жоқ» дейді дана халқымыз. Іргемізде осындай тамаша демалыс аймағы бар екенін білсек те онда барып, серуендеп қайтуға уақыт таба бермейтініміз жасырын емес. Табиғатпен етене араласып, одан рухани нәр алып, бір жағы спортпен шұғылданып қайтудың адам ағзасына өте пайдалы екенін осы жолы қапысыз ұққандай болдық. Қаланың қапырығынан қашып, таудың таңғы шықтай таза ауасын жұтып, өмірімізге сәл де болса өзгеріс енгізгеніміздің артықтығы жоқ-ау!
Қуат Қайранбаев
Қарасай ауданы.
