Өзбекстанда Қазақ медицинасының күндері басталды. Ауқымды шара аясында отандық жетекші дәрігерлер бауырлас елдің әр аймағына шығып, кездесулер, дәрістер, шеберлік сабақтары және тәжірибе алмасу семинарларын өткізуде. Іс-шараның басты мақсаты – Қазақстан мен Өзбекстан арасындағы медициналық ынтымақтастықты нығайту, білім мен технологияны біріктіру, сондай-ақ аймақтарда заманауи емдеу тәсілдерін енгізуге серпін беру.
Қазақ медицинасының күндері аясында травматология және ортопедия саласындағы әріптестік ерекше мәнге ие болды.
Академик Н.Ж. Батпенов атындағы Ұлттық ғылыми травматология және ортопедия орталығының делегациясы Ташкентке арнайы барып, Өзбекстандағы ТОҒЗИ (Травматология және ортопедия ғылыми-зерттеу институты) ұжымымен кездесті.
Кездесу барысында артроскопия, эндопротездеу, табан хирургиясы және омыртқа патологиясын түзету бойынша көрсетілімдік ота (мастер-класс) операциялары жасалды. Бұл шаралар қазақстандық және өзбек хирургтарының тәжірибесін біріктіріп, практикалық білім алмасудың нақты үлгісіне айналды.
Орталық директоры, медицина ғылымдарының докторы Олжас Бекарисов екі елдің медициналық қауымдастығы арасындағы сенімді және ашық диалогтың маңыздылығын атап өтті:
«Біз бұл күндерді ресми іссапар ретінде емес, сенім мен ортақ дамуға бағытталған берік көпір құру мүмкіндігі ретінде қабылдаймыз. Қазіргі медицина ашықтықты, технологиямен және біліммен алмасуды талап етеді. Қазақстан мен Өзбекстанды тек география ғана емес, адам денсаулығына қамқорлық жасау мен заманауи шешімдерді енгізу сияқты ортақ мақсаттар байланыстырады», – деді Олжас Бекарисов.
Өзбекстандағы ТОҒЗИ өкілдері де қазақстандық мамандардың кәсіби біліктілігін және тәжірибемен бөлісуге деген ашық ұстанымын ерекше атап өтті.
«Біз бұл шараны бәсеке емес, достық серіктестік ретінде көреміз. Бұл пациенттерге сапалы және заманауи медициналық көмек көрсетуге мүмкіндік береді. Мұндай кездесулер – екі ел арасындағы ұзақ мерзімді ынтымақтастықтың берік іргетасы,» – деді өзбек тарапының өкілі.
«Қазақ медицинасының күндері» бағдарламасы аясында пациенттерді қабылдау, семинарлар, тәжірибелік тренингтер және екі ел мамандарының қатысуымен өткізілетін пікірталастар ұйымдастырылуда.
Шараның негізгі мақсаты – кәсіби байланыстарды нығайту, тәжірибе алмасу, және болашақта бірлескен ғылыми жобалар мен медициналық инновацияларды дамытуға жол ашу.
«Жетісу-Ақпарат»
