Қазақстан Республикасы Денсаулық сақтау министрлігінің мәліметінше, 2026 жылдың қаңтар айындағы жағдай бойынша ел аумағында Нипах вирусын (NiV) жұқтыру немесе сырттан әкелу деректері тіркелген жоқ. Эпидемиологиялық ахуал толық бақылауда, – деп хабарлайды 7-su.kz ақпараттық порталы Massaget.kz сайтына сілтеме жасап.
Ведомство мәліметінше, қазір елдегі эпидемиологиялық жағдай тұрақты және бақылауда.
«Денсаулық сақтау министрлігі профилактика мақсатында және Үндістандағы Нипах вирусы бойынша эпидемиологиялық жағдайға байланысты мемлекеттік шекара арқылы барлық өткізу бекетінде санитария-карантин бақылауын күшейтті. Үндістаннан және ауру тіркелген Оңтүстік-Шығыс Азияның басқа елдерінен келген адамдарға ерекше назар аударылады. Осы инфекция бойынша қолайсыз елдердің тізімі тұрақты түрде қайта қаралады және жаңартылады», – деп жазылған хабарламада.
Медициналық ұйымдар барлық жағдайға дайын екені айтылды.
«Шұғыл медициналық көмек және инфекциялық стационарлар бригадалары дайын, дәрілер, жеке қорғаныс, дезинфекциялау құралдарының қоры бар», – деп жазылған хабарламада.
Министрлік эндемиялық елдерге сапар шегуді жоспарлап отырған азаматтарға жеке профилактика шараларын сақтауды, елге келгеннен кейін ауру белгілері пайда болса, дереу медициналық көмекке жүгінуді ұсынды.
Нипах вирусы зооноз инфекцияға жатады. Ол адамға жануарлардан, соның ішінде жарқанаттар мен шошқалардан, ауру жұқтырған адаммен тығыз байланыстан жұғады. Ластанған тағамдар мен сусындар арқылы да берілуі мүмкін.
Ауру жоғары температура, бас ауруы, жалпы әлсіздік, ал ауыр жағдайларда орталық нерв жүйесі зақымдалуы және пневмония арқылы көрінеді. Бүгінде Нипах вирусына қарсы арнайы ем және мақұлданған вакцина жоқ.
