Денсаулық сақтау саласында соңғы 3 жылда 98 нысан пайдалануға берілді. Оның 31-і жаңадан салынды. Өңірде 61 блокты-модульді медициналық кешен орнатылып, 6 нысан күрделі жөндеуден өтті. Соңғы жылдары блокты-модульді емхананың жылдам және ыңғайлы құрастырылатыны дәлелденді.
Айта кету керек, біздің облыс блокты-модульді медициналық кешендерді орнату тәжірибесін алғашқылардың бірі болып кеңінен қолдана бастады. Күзде Денсаулық сақтау министрі Ақмарал Әлназарова Көксу ауданын аралап, блокты-модульді емхананың тиімділігін көріп, осындай емхананы болашақта да көптеп тұрғызу керектігін айтқан.
Биыл өңірде жаңадан 51 медициналық нысан бой көтерді. Оның 25-і жаңа құрылыс, 26 блокты-модульді медициналық емхана.
Келесі жылы тағы 69 медициналық нысанды қолданысқа беру жоспарлануда. Ғимараттың 44-і жаңадан салынады. Оның 36-сы ауылдық денсаулық сақтауды жаңғырту, 18-і блокты-модульді кешен және 7-уі күрделі жөндеу қабылданған шаралардың нәтижесінде іске қосылады. Облыста жөндеуге жататын 292 денсаулық сақтау нысанының 167-і немесе 57,2 пайызы жаңартылады.
Гүлжан МҰҚАШҚЫЗЫ
