Жетісу облысында инфекциялық және паразиттік аурулар бойынша эпидемиологиялық жағдай тұрақты. Өңірде жұқпалы аурулардың алдын алу мақсатында 102 нозология бойынша санитариялық-эпидемиологиялық ахуалға тұрақты мониторинг жүргізіліп, инфекция ошақтарында алдын алу және эпидемияға қарсы шаралар қабылдануда.
2025 жылы өткен жылмен салыстырғанда 34 нозология бойынша сырқаттанушылық деңгейінің төмендеуі байқалды. Қабылданған кешенді шаралардың нәтижесінде облыста бірқатар қауіпті және карантиндік инфекциялар тіркелген жоқ.
Ұлттық егу күнтізбесіне сәйкес елімізде 21 инфекцияға қарсы вакцинация жүргізіледі. 2025 жылы Жетісу облысында 16 жасқа дейінгі 41 555 бала профилактикалық екпемен қамтылды. Қазіргі уақытта вакцинамен қамтуда айтарлықтай тапшылық жоқ, иммундау жүйесі тұрақты жұмыс істеп тұр.
2025-2026 жылдардағы эпидемиологиялық маусымда облыста ЖРВИ жағдайларының маусымдық өсуі байқалды. Сырқаттанушылықтың басым бөлігі балалар арасында тіркелген. Мамандар бұл жағдайды жыл сайын қайталанатын маусымдық үрдіспен байланыстырады.
Эпидемиологиялық маусым басталғалы облыста алдын алу шаралары күшейтілді. Жергілікті бюджет есебінен тұмауға қарсы вакцинация жүргізіліп, халықтың 12,3 пайызы қамтылды. Білім беру ұйымдарында сырқаттанушылық деңгейі бақылауда, мектептерде онлайн оқытуға көшу жағдайлары тіркелген жоқ.
Қызылша бойынша жағдай тұрақты бақылауда. 2025 жылы сырқаттанушылық өткен жылмен салыстырғанда айтарлықтай төмендеді. Дегенмен ауру жағдайларының басым бөлігі екпе алмаған балалар арасында анықталуда. Осыған байланысты өңірде қосымша вакцинациялау және медициналық бақылау шаралары жүргізілуде.
Мамандар вакцинацияның маңыздылығына ерекше назар аударады.
«Вакцинация – жұқпалы аурулардың алдын алудың ең тиімді жолы. Әлеуметтік желілерде, әсіресе Instagram желісінде вакцинаға қатысты түрлі ақпараттар тарайды, бірақ олардың барлығы бірдей ғылыми негізге сүйенбейді. Сондықтан тек ресми дереккөздерге сену қажет. Вакцина ауру тудырмайды, керісінше оның алдын алып, асқыну қаупін азайтады. Әр екпенің өз уақыты бар, оны сақтау иммунитет қалыптастыру үшін маңызды. Балалар арасында қызылша, қызамық, паротит сияқты қауіпті аурулар әлі де кездеседі. Бұл инфекциялар ауыр асқынуларға әкелуі мүмкін. Бұрын, 60–70 жылдары полиомиелит кең таралып, көптеген балалар мүгедек болған. Вакцинацияның арқасында бұл ауру жойылды, алайда бүгінде кей ата-аналар екпеден бас тартып жатыр. Қазақстанда Ұлттық екпе күнтізбесіне сәйкес 21 инфекцияға қарсы вакцинация тегін жүргізіледі. Вакцинация – тек бір баланың емес, бүкіл қоғамның қауіпсіздігі үшін қажет», – деді Жетісу облысы санитариялық-эпидемиологиялық бақылау департаментінің басшысы Асхат Сәкенұлы.
Эпидемиологиялық ахуалды тұрақты сақтау мақсатында облыста мониторинг жалғасып, инфекция ошақтарында алдын алу және санитариялық талаптар күшейтілген.
«Жетісу-Ақпарат»
