Танымал айтыскер ақын Балғынбек Имашев қоғамда қызу талқыға түскен дін және этика мәселесіне қатысты өз ойын ашық білдірді. Өнер иесі кезінде депутат Ринат Зайытовтың «намазхандар» туралы айтқан сыни пікірін уақыт өте келе қалай түсінгенін жеткізді, – деп хабарлайды 7-su.kz ақпараттық порталы QazaqToday.info сайтына сілтеме жасап.
Бүгінде алаяқтық оқиғаларының жиілеп кеткені соншалық, қаскөйлер халықтың сеніміне кіру үшін ең қасиетті құндылықтарды қолданудан тайынбайды. Айтыскердің пайымдауынша, қоғамда адамның ішкі дүниесіне емес, тек сыртқы келбетіне қарап баға беру белең алған. Бұл өз кезегінде алаяқтар үшін таптырмас мүмкіндікке айналып отыр.
Балғынбек Имашев бұл мәселенің мәнін былай деп түсіндірді:
«Діндар адам, намазхан екен десе сеніп қаламыз ғой. Кезінде Ринат «намазхандардың» көбісі алаяқтар дегенде қарсы шығып, олай айтпа деп едім. Кейіннен қарасам шынымен біз діннің тек сыртқы келбетін алып алған екенбіз. Сақал қою, намаз оқу. Негізі дін деген ол аманат. Ол адамның ақысын жемеу, уәдеде тұру, қарызыңды қайтару, біреудің аманатын қайтару. Себебі әрбір мұсылманның ары, жаны, малы құрметті. Харам деген сол нәрселерге қол сұғуға рұқсат жоқ деген сөз. Құрметті деген сөз жатыр. Сол нәрселерге мән бермей мынау намаз оқиды ғой деп сеніп қаламыз. Неге көп жағдайда елді алдағанда алаяқтар Алланың атын жамылады. Себебі дінге, Аллаға деген құрметін пайдаланып, елдің аяғын аспаннан келтіреді», – деді айтыскер.
Ақынның сөзі діндар қауымға да, қарапайым халыққа да үлкен ой салады. Шынайы мұсылмандық тек құлшылықпен ғана емес, ең алдымен адамгершілікпен, адалдықпен өлшенуі тиіс. «Харам» ұғымы тек ақша мен мүлікке ғана емес, өзгенің ары мен сеніміне қиянат жасамауды да қамтитынын есте сақтаған жөн.
Посмотреть эту публикацию в Instagram
Бұл ретте сарапшылар азаматтарды сақтық танытуға шақырады. Кез келген қаржылық мәселеде немесе маңызды келісімдерде адамның сыртқы бейнесіне немесе айтқан діни сөздеріне ғана иек артпай, құқықтық сауаттылық таныту қажет. Тек қана сыни ойлау мен шынайы рухани құндылықтарды ажырата білу арқылы ғана біз алаяқтардың құрығынан құтыла аламыз.
