Биыл мұсылман қауымы үшін қасиетті айлардың бірі Шағбан айының 15-түні, яғни Бараат түні ақпан айының 2-нен 3-не қараған түнге сәйкес келіп тұр. Бұл түн – пенденің бір жылдық тағдыры бекітіліп, ризық-несібесі мен ажалы нақтыланатын ерекше уақыт, – деп хабарлайды 7-su.kz ақпараттық порталы Qaz365.kz сайтына сілтеме жасап.
Қазақстан мұсылмандары діни басқармасы (ҚМДБ) Шариғат және пәтуа бөлімінің маманы Медет Құрмашұлының түсіндіруінше, Бараат «кешірім», «тағдыр» және «тозақтан құтылу» деген мағыналарды білдіреді. Бұл түні Алла Тағала Өзінің шексіз мейірімімен кешірім сұраған пенделерінің күнәсін кешіріп, оларды тозақ отынан азат етеді.
Бараат түнінің басты қасиеттері
Маман бұл түннің маңыздылығын бірнеше негізгі бағытқа бөліп көрсетеді:
-
Тағдырдың нақтылануы: Пайғамбарымыз (оған Алланың салауаты мен сәлемі болсын) бұл түнде сол жылы дүниеге келетіндер мен дүниеден өтетіндер жазылатынын, амалдар көтеріліп, ризықтар белгіленетінін айтқан.
-
Дұғалардың қабыл болуы: Имам Шафиғи бес түнде тілеген дұғаның кері қайтарылмайтынын айтқан, соның бірі – Бараат түні.
-
Жалпы кешірім: Алла Тағала күн ұясына батқаннан бастап таң шапағы атқанға дейін: «Кешірім тілеуші бар ма, кешірейін. Ризық сұраушы бар ма, ризық берейін», – деп рақымын төгеді.
Бұл түні қандай құлшылықтар жасаған абзал?
Бараат түніне тән арнайы бекітілген ғибадат түрі жоқ, алайда Медет Құрмашұлы келесі ізгі амалдарды орындауды мұстахаб (ұнамды іс) деп санайды:
-
Намаз оқу: Түнді нәпіл намаздармен өткізу сауапты. Намаз жамағатпен емес, әркім өз бетінше жеке оқылады.
-
Құран және салауат: Қасиетті Құран аяттарын оқып, Пайғамбарымызға (оған Алланың салауаты мен сәлемі болсын) көптеп салауат жолдау, тәсбих тарту.
-
Ораза ұстау: Шағбан айының 13, 14 және 15-күндері ораза ұстау – сүннет. Әсіресе, амалдар көтерілетін сәтте аузы берік болу – үлкен нығмет.
-
Тәубе ету: Жүректі кек пен ашудан тазартып, өткен қателіктер үшін кешірім сұрау.
Маңызды ескерту: Кімдер мейірімнен мақұрым қалады?
Хадистерде айтылғандай, Алла Тағала бұл түні барлық пендесіне мейіріммен қарайды, бірақ кейбір санаттағы адамдар кешірімнен тыс қалуы мүмкін. Олардың қатарына Аллаға серік қосушылар, мұсылман бауырына кек сақтағандар, туыстық қатынасты үзгендер, ата-анасына қарсы шыққандар және араққа салынғандар жатады.
Қорыта айтқанда, Бараат түні – Рамазан айына дейінгі ең үлкен рухани белес. Бұл уақытты ғапылдықпен өткізбей, тәубемен, дұғамен өткізу әрбір мұсылман үшін маңызды.
