Елімізде Рухани келісім күні 18 қазанда аталып келе жатқанына биыл 29 жыл толып отыр. Елбасы Нұрсұлтан Назарбаевтың тапсырмасымен көпұлтты және көпдінді Қазақстан Республикасы атаулы күнге ерекше назар аударуда. Еліміздің тыныштығы мен тұрақтылығы, бейбітшілігі мен ырыс-құты өзара тығыз келісімге байланысты екендігін осы күні ұғынып отырмыз. Осыған орай облыстық дін істері басқармасы салтанатты шара өткізіп, Жетісу жерінің діни бірлестіктері мен конфессияаралық келісімді ұлықтаған жандарды марапаттады.
Салтанатты жиынды жүргізіп отырған облыстық дін істері басқармасының басшысы Бауыржан Ниет алғашқы сөз кезегін Қазақстан Мұсылмандары діни басқармасының құрушысы, алғашқы мүфти Рәтбек қажы Нысанбайұлына берді. Одан соң Астана және Алматы епархиясының викариі, Қаскелең епископы Михаил Гоголев, Талдықорған қаласы Рим-католик шіркеуінің жетекшісі Юлиан Манковски, Алматы және Алматы облысы бойынша «Өмір бұлағы» діни бірлестігінің басшысы, Қазақстандағы елуіншілер шіркеулер одағы басқармасының мүшесі Виталий Пак, облыстық «Jetіsý» газетінің бас редакторы Әміре Әрін, Қазақстан Мұсылмандары діни басқармасының наиб мүфтиі Кенжеәлі Мырзабаев сөз алып, еліміздегі ынтымақ пен ырыстың, тыныштық пен бейбітшіліктің бастауы дінаралық келісімде жатқандығын тілге тиек етті.
Жиын соңында дін саласында еңбек етіп жүрген 30 адам «Конфессияаралық келісімді дамытуға қосқан үлесі үшін», «Жоғары рухани қызмет», «Үлгілі діни ғибадат», «Рухани тәлімгер», «Сауапты іс» сынды номинациялармен марапатталды.
М. ӘСЕТҰЛЫ
