84 жасқа қараған шағында тәуелсіз Қазақстанның рухани дамуына өлшеусіз үлес қосқан көрнекті дін қайраткері, еліміздің тұңғыш Бас мүфтиі Рәтбек қажы Нысанбайұлы өмірден озды, – деп хабарлайды 7-su.kz ақпараттық порталы Todayinfo агенттігіне сілтеме жасап.
Рәтбек қажы еліміз егемендік алған алмағайып кезеңде мұсылман қауымының басын біріктіріп, Қазақстан мұсылмандары діни басқармасының (ҚМДБ) іргетасын қалаған тарихи тұлға. Ол 1990 жылы өткен бірінші құрылтайда бірауыздан Бас мүфти болып сайланып, он жыл бойы діни саланы басқарды.
Марқұм заманының білімдар азаматы болды. 1975 жылы Ливиядағы ислам университетін үздік тәмамдап, жеті тілді, оның ішінде араб, ағылшын және неміс тілдерін жетік меңгерген. Оның ағартушылық бағыттағы ең ірі жобасы – Құран Кәрімді қазақ тіліне аудару ісіне жетекшілік етуі болды. 1991 жылы жарық көрген бұл аударма 200 мың данамен таралып, халқымыздың рухани шөлін қандырды.
Рәтбек қажының басшылығымен елімізде 68 жаңа мешіттің құрылысы жүргізілді. Ол тек ғимарат салумен шектелмей, дін мамандарын даярлауға да басымдық берді. Оның тікелей қолдауымен 600-ге жуық жас имам Түркия мен Мысырдың алдыңғы қатарлы оқу орындарында білім жетілдіріп, елге оралды. Сонымен қатар, қажы 15-ке жуық діни-танымдық кітап жазып қалдырды.
Кейінгі жылдары Рәтбек қажы Алматы облысының Есік қаласында тұрып, жергілікті мешітте имамдық қызметін жалғастырып, жастарға тәлім-тәрбие берді. 2020 жылы оның мемлекет алдындағы еңбегі ескеріліп, Президент Қасым-Жомарт Тоқаевтың жарлығымен «Парасат» орденімен марапатталды.
Бұл қазақ қоғамы мен діни қауымдастық үшін орны толмас қаза. Тұңғыш мүфтидің өнегелі өмірі мен руханият жолындағы қажырлы еңбегі халық жадында мәңгі сақталады.
