Жер жаннаты Жетісуда конфессияаралық келісім мен қоғамдық тұрақтылық жақсы сақталған. Әрине, бұл ең алдымен Қазақстан халқының ізгілік пен бейбітшілік құндылықтарын ұстануы, конфессиялар мен этностардың оң диалогы, дін саласындағы мемлекеттік саясаттың нәтижесі екенін атап өткен жөн.
Тұрақтылық пен татулықты одан әрі нығайтуға дін істері басқармасы да мұрындық болып отыр. Өңірде конфессияаралық келісімді сақтау, оны одан әрі нығайту мақсатында діни бірлестік жетекшілерінің клубы табысты жұмыс істеп келеді. Бұл алаң түрлі дін өкілінің бас қосып, өзекті мәселелерді бірлесе талқылауына мүмкіндік береді. Клуб негізінен екі бағыт бойынша жұмыс істейді. Оның біріншісі – «Діни бірлестік жетекшілерінің клубы» қызметін үйлестіру. Яғни, жыл ішінде «дөңгелек үстел», «Ореn Air» форматында және көшпелі форматта кездесулер ұйымдастырылады. Екіншісі – Қазақстанның 2050 жылға дейінгі Даму стратегиясы мен басқа да маңызды стратегиялық құжаттарға сәйкес келетін «Салауатты рух» рухани және спорттық шараларды ұйымдастыру. Бұл бағыт аясында шағын футбол, үстел теннисі, ұлттық спорт ойындары, танымдық экскурсиялар, театрландырылған қойылымдар мен концерттер тамашалау сынды шаралар қарастырылған. Сонымен қатар, мемлекеттік және Ұлттық, мерейтойлық мерекелерге орайластырылған, клуб мүшелерінің қатысуымен семинарлар, интеллектуалды ойындар, одан бөлек, облыс имамдары арасында қазақ күресінен байрақты бәсеке де өткізілді. Достық пен өзара сыйластыққа негізделген мұндай диалог алаңында талқыланатын кез келген маңызды мәселе оң шешімін табары сөзсіз.
Облыстағы діни конфессиялар мен бірлестіктердің алуантүрлілігі, олардың арасындағы келісім мен ынтымақтастық еліміздің діни және мәдени байлығын көрсетеді. Осы бағытта жүзеге асырылып жатқан іс-шаралар, ақпараттық-түсіндіру жұмыстары діни экстремизмнің алдын алуға және қоғамдағы дінаралық татулықты сақтауға бағытталған.
Темірлан Айтбай
Талдықорған қаласы
