Кең-байтақ Қазақстан құшағына көп ұлтты сыйдырып, олармен бірлік пен теңдікте, татулық пен ынтымақта өмір сүріп келеді. Атам заманнан бері осы ынтымақ пен бірліктің арқасында талай тарихи белестерден өтіп, қиындықты еңсеріп, іргесі бүтін ел болдық. Бір ғана Талғар ауданында 30-ға жуық этнос өкілдері тұрады. Ауданда 2 грек, 2 ұйғыр, 22 славян, беларусь, басқа да этномәдени орталығы жұмыс істейді.
Тәуелсіздік алғалы бері барлық ұлт өкілдері бір шаңырақ астында тіршілік етудеміз. Олардың қазақ халқын туған бауырындай көріп, балаларын қазақ мектептеріне беріп, судай сіңіп, құда-жекжат болып, салт-дәстүрімізге де құрметпен қарайтыны қуантады.
Еліміздің татулығы – басты құндылығымыз. Сондықтан «Төртеу түгел болса, төбедегі келеді» деген тәмсіл бекерден-бекер айтылмаса керек. Алайда, жыл басында орын алған жағдай, яғни, қаңтар оқиғасы осы елдігімізге, тыныштығымызға сызат түсіріп қана қоймай, сан жүздеген отбасына қара жамылдырды. Елдің берекесін қашырып, тынышын кетірді. Осы бір қиын-қыстау шақта ел Президенті Қасым-Жомарт Тоқаевтың шұғыл Үндеу жасауы, халықпен бірге екенін жария етуі қобалжыған көңілге демеу болды. Одан кейінгі «Қасіретті қаңтар» сабағы: қоғам тұтастығы – Тәуелсіздік кепілі» атты мәлімдемесінде де алдағы атқарылар жоспарлар мен іс-шараларды шегелеп берді. Жаңа Үкіметке нақты тапсырмалар беруі ел ертеңінің жарқын болуына, халықтың әл-ауқатының жақсаруына бағытталғанын бағамдадық. Мемлекет басшысының әр сөзінен халыққа деген қамқорлығын сезіндік.
Қасым-Жомарт Тоқаевтың отандық бизнес өкілдерімен кездесуінде халық игілігі үшін билік пен бизнестің өзара ықпалдастығы керектігі айтылды. Жасыратыны жоқ, билікті жекелеген адамдардың қарабастың қамына пайдалануының салдарынан билік пен халықтың аражігі ажырады. Сенімсіздік күшейді, әлеуметтік толқулар пайда болды.
– Қағаз жүзіндегі әлеуметтік-экономикалық мәселе мен оның қазіргі шынайы жағдайының арасындағы алшақтық сын көтермейді. Сондықтан, шұғыл түрде экономикалық саясатты қайта қарау жұмысына бірлесе кірісу керек. Таза, ашық және әділ іс-әрекеттердің жаңа тәртібін анықтаған жөн, – деген Мемлекет басшысы Қасым-Жомарт Тоқаев бизнес-қауымдастықты осыдан сабақ алып, жаңа Қазақстанның негізі болуға тиіс жаңа экономикалық саясатты қалыптастыру үшін бірлесіп жұмыс істеуге шақырды.
Жаңа Қазақстанды құруға атсалысатын кәсіпкерлердің, шағын және орта бизнес өкілдерінің күшін жұмылдыруға арналған бұл бастамалардың оң нәтижесі болары анық. «Қазақстан халқына» қорының құрылуы соның бір көрінісі. Қандай істі қолға алсақ та әлеуметтік теңсіздіктен арылып, әділдік орын алса елдің ауызбіршілігі артып, ертеңгі күніне сенімі нығая түсері сөзсіз.
Өзім ұрпақ тәрбиелеп, бала өсіріп отырған ұстаз-ана ретінде еліміздің іргесі аман, босағасы бүтін болса екен деп тілеймін! Тыныштыққа, бейбіт өмірге жетер бақыт бар ма?!
Жұмағыз Бұтабаева,
аудандық қоғамдық келісім кеңесінің төрайымы,
Талғар ауданының Құрметті азаматы
Талғар ауданы
