Газетіміздің 100 жылдық тойы жақындаған сайын әріптестеріміз сый-құрмет көрсетіп, басылым жайлы жазып, айтып жатыр. Сондай бір жылы жүздесуді облыстық «Жетісу» телеарнасының «Таңжарық» бағдарламасы ұйымдастырды. Таңғы бағдарламаға газеттің үш буыны келді. Журналист Диас Нұрлыбай мерейтойлық сұхбатты құттықтаудан бастады. Жақсы сөз – жан семіртеді! Жылы басталған жүздесу тележурналист пен газет тілшілерінің арасында арнасын тапқан су ағысындай жарасым тапты.
Өткенін білмеген ұрпақ бүгінін қадірлей алмас. Әңгіме 100 жылдықтың тарихынан бастау алды. «Жетісу» газеті бас редакторының орынбасары Нүсіпбай Әбдірахым: – «Жетісу» газетінің бірінші саны «Жетісу ісші халық мұхбірі» яғни «Жетісу жұмысшыларының хабаршысы» деген атпен 1918 жылдың 21 маусымында жарыққа шықты. Алматы өңірі жұртшылығын күнделікті жаңалықтардан құлағдар еткен газет алғашқы сандарынан-ақ сол кездегі қоғамдық-саяси жағдайларды түсіндіріп, таразылайтын мақалалар басты. Басылым әдепкіде қазақ, қырғыз, өзбек және татар тілдерінде аралас жарық көрді. Газеттің алғашқы редакторы – Сабыржан ШӘКІРЖАН деген азамат еді», – деп газеттің шығу тарихына шолу жасады. Нүсіпбай Додабайұлы одан ары қарай газетте кімдердің істегеніне тоқталды. Ол басылымда Ахмет Байтұрсынов, Әлихан Бөкейханов, Ілияс Жансүгіров, Сәкен Сейфуллин, Бейімбет Майлин, Ораз Жандосов, Мұхтар Әуезов, Жүсіпбек Аймауытұлы, Мағжан Жұмабаев сынды азаттықты аңсаған Алаш арыстарының өлең, әңгіме, публицистикалық мақалаларының жарық көргенін, бірақ, сол кездегі саяси жағдайға байланысты олардың шығармалары көбінесе бүркеншік есіммен басылып отырғандығын айтты.
«Таңжарық» бағдарламасында журналист Гүлжан Тұрсын «Жерұйық» газетінің тарихы жайлы да айтып өтті. Басылым 1968 жылы жарық көріп, кейіннен аты бірнеше рет өзгерген. Басылымның алғашқы редакторы Баянды Мәдиев. Сұхбатқа қатысушылар облыстық газет журналистерінің қалада қазақ мектептері мен балабақшалардың ашылуына ұйытқы болғанын әңгімелеп берді.
Газеттің орта буын журналисі Қажет Андас шетелден келген соң жұмыс іздеп көп жүргенін, бақытына орай бір күні бүгінгі басылым редакторымен көпшілік ортада кездесіп, «Жетісуға» қызметке орналасқаны жайлы қызықты естелік айтты. Бүгінде журналистің дүниетанымы өсіп, бірнеше кітап шығарып, халықаралық жобаларға қатысып, елге танылып үлгерген. Қаламгер осы жетістігінің барлығына «Жетісуда» қызмет істегенінің арқасында жеткенін айтты.
Студияға кірген жас буын «Жетісудың» қамқорлығына тоқталды. Басылымның жас журналистері шығармашылықтарын шыңдап, дүбірлі додаларға өлең-әңгімелерін қосып, бәйгенің алдын бермей келеді. Сондай-ақ, келген жасты қанатының астына алып, әлеуметтік жағдайының шешуіне көмектесетін басылым соңғы жылдары бірнеше жас тілшінің пәтер алуына ықпал етті.
Үш буынның ойы бір жерде тоғысты. Ол – ғасыр жасаған «Жетісудың» қадір-қасиеті. Елге сіңірген еңбегі. Табалдырығын аттаған жанның бағын ашатын басылым оқырмандарына тұшымды мақалалар ұсынуда үнемі ізденіс үстінде. Алдағы уақытта да редакция ұжымы көпшіліктің көкжиегін кеңейтер мақалаларды көптеп жазбақшы.
Гүлжан Мұқашқызы
