Қаратал ауданындағы «Когер ЛТД» ЖШС құс фабрикасы жетекші кәсіпорындардың бірі. Серіктестік 1997 жылы құрылып, содан бері инкубациялық жұмыртқа мен оның ұнтағы және тауық еті мен тартылған ет өндірумен айналысады.
Компания, сондай-ақ, елімізде өнімділігі жоғары жұмыртқа туатын тауық өсіру бойынша асыл тұқымды шаруашылықты іске қосқан алғашқы кәсіпорын. Өндірісте шетелдік жабдықтар орнатылған. Бұған қоса, жем өндіретін өндірістік желілер жұмыс атқарып тұр. Компания өнімі «Ақ құс» сауда белгісімен шығарылады.
Бүгінгі таңда компанияда ересек және жас балапандарға арналған 1,4 миллион құс орны бар. Жұмыртқа жинау, таңбалау, сұрыптау және орау үдерісінің бәрі автоматты түрде жүзеге асырылады. Осы арқылы құс өсірушілер жұмыртқаның қай торға салынғанын және оның қоймаға қашан түскенін біліп отырады. Бүкіл технологиялық үдерісті цифрландыру жедел шешім қабылдап, өндірісті жоғары деңгейде басқаруға көмектеседі.
Кәсіпорын «Нұрбанк» АҚ арқылы субсидиялау құралы бойынша «Кәсіпкерлікті дамытудың 2021-2025 жылдарға арналған ұлттық жобасы» бағдарламасы шеңберінде инвестицияларға несие алып, «Даму» қорының кепілдігі берілді. Бүгінде компания өнімдері сапа жағынан жоғары және ол жаңа нарықтарға шығуға ықпал етеді. Өндіріс көлемі қазір жылына 400 миллионнан аса жұмыртқа шығаруға қауқары жетеді. Өнімдер бүкіл Қазақстан бойынша, сондай-ақ, Орталық Азия елдері мен Ауғанстанда сатылады.
Айгүл Байжұмақызы
Қаратал ауданы
