Жетісу жерінде жүзеге асырылатын 22 агрожоба бар. Олар жыл соңына дейін іске қосылып, жеке инвестиция есебінен 6,6 млрд. теңге қаражат жұмсалмақ. Аталған жобаларды іске қосу есебінен аймақта 455 жұмыс орны құрылады.
Мысалы, облыста жалпы құны 3,2 млрд. теңгені құрайтын үш тауарлы сүт фермасын ашу көзделуде. Олардың ішінде ең ірісі 800 бас ірі қараға арналған агрожоба. Үш ферманың іске қосылуы 70-ке жуық адамды жұмыспен қамтуға мүмкіндік береді. Сондай-ақ, 565,7 млн. теңгеге ет-сүт бағытында тағы бір жобаны іске асыру жоспарда бар. Мұнда жыл сайын 460 мың келі ірі қара мал еті, 3,7 млн. литр сүт өндіріліп, 40-тан аса жұмыс орындары ашылмақ.
Сонымен бірге 1,2 мың бас ірі қара және 3 мың бас ұсақ мал бордақылайтын кешен салынып, нәтижелі жұмыс атқарылмақ. Оны іске қосу 594 млн. теңгеге бағаланып отыр. Сөйтіп, 25 жұмыс орны құрылады деп болжануда. Тұқымы асыл сиыр көбейту де маңызды. Бұл жоба да жыл соңына дейін жүзеге асырылуы тиіс. Осының аясында тауарлы-сүт фермасы мен биогаз және биогумус өндірісін ұйымдастыру жоспарда бар. Инвестицияның жалпы көлемі 180 млн. теңгені құрайды.
Бұған қоса, 100 бас ірі қараға арналған бордақылау алаңын іске қосу көзделіп отыр. Іске асыру мерзімі – 2020-2024 жылдар, сондай-ақ, оның қуаты жылына 35 тонна ет өндіруге қауқары жетеді. Тағы бір нысанда жылына 50 тоннаға дейін ет өндірілетін болады. Жылына 365 мың литр сүт және 10 мың келі сиыр еті өндірісін жолға қоятын бордақылау алаңы іске қосылмақ.
Қазіргі кезде жұмыс істеп тұрған жылқы шаруашылығы кеңейтіліп, қымыз өндірісін шикізатпен қамтамасыз ету ісі жандандырылмақ. Жоба 72 млн. теңгеге бағалануда. Биыл құс фермасын ашу ісі де ойға алынып отыр. Мұнда жылына 5 мың тонна ет шығарылатын болады. Сондай-ақ, балықты қайта өңдеу және балық сүйегінен ұн өндіру цехы іске қосылады деп күтілуде. Құны — 400 млн. теңге. Айта кетейік, қайта өңдеу қуаттылығы тәулігіне 2 тоннаны, ал өндіріс қуаттылығы тәулігіне 5 тоннаны құрайды. Нәтижесінде 30 адамның жұмысқа орналасуына мүмкіндік ашылады.
Облыста жыл аяғына дейін жаңғақ өсіру жобасы жүзеге асырылмақ. Ақпаратқа сәйкес, 7-10 жастағы бір өсімдіктен жылына 100 келіден аса жеміс жинауға болады. Құны – 115 млн. теңгені құрайтын жоба аясында 40 адам жұмыспен қамтылмақ. Сонымен қатар аймақта инновациялық технологиясы бар жеміс-жидек өсіру жобасы пайда болады. Қуаты — жылына 500 тонна, құны — 100 млн. теңгені құрайды. Осындай жобалардың арқасында талай адам екі қолға бір күрек тауып, жемісті еңбек етпек.
Айгүл Байжұмақызы
Фото: dzen.ru
