Бүгінгі таңда шағын және орта кәсіпкерлікті өркендету маңызды. Өйткені, ол елдің әлеуметтік-экономикалық дамуына оң ықпалын тигізеді.
Қазіргі таңда мемлекет тарапынан бизнеске бағытталған қолдау шаралары жетерлік. Өңірлік «AMANAT» партиясы филиалының төрағасы Арыстанғали Арын облыстық кәсіпкерлер палатасының директоры Дәурен Оңалбаевпен Көксу ауданы және Текелі қаласында кәсіпкерлікті қолдау шаралары бойынша көшпелі қоғамдық қабылдау өткізді. Өтініш арқалап келген азаматтардың мәселелері өзекті. Ал азаматтардың мүдделерін ілгерілету – партияның ең маңызды міндеттерінің бірі.
Қоғамдық қабылдауға келген Текелі қаласының тұрғыны Нұрқанат Тілеуханұлы қазіргі кезде ең ауқымды «Aуыл аманаты» жобасы аясында кәсіп дөңгелеткісі келетінін жеткізді. Ол 2,5%-бен берілетін несие қарапайым азаматтарға өте тиімді екенін тілге тиек етіп, асыл тұқымды мал алу шарттарына өзгерістер енгізілсе деген өтінішін білдірді. Келген азаматтардың басым бөлігі «Aуыл аманаты» жобасына қызығушылық танытуда.
Сонымен бірге, қабылдау барысында тұрғындар тарапынан қайтарымсыз грант, кәсіппен айналысатын көпбалалы аналардың салық төлеу мәселесі, «Бизнес бастау» жобасы бойынша құжаттарды рәсімдеудің жолдары мен қандастардың несие мен құжат жинауда туындайтын қиындықтары туралы мәселе көтерілді.
– Ауыл халқы үшін жеке кәсіп ашу мәселесі әлі де өзекті. Халық әлі күнге дейін қаржылық сауаттылық, мемлекеттік бағдарламалар мен кәсіпкерлік саласының ұтымды тұстарын жіті білмейді. Біз сол себепті облыстық кәсіпкерлер палатасымен бірлесіп аталмыш шараны ұйымдастырдық, – дейді өз сөзінде «AMANAT» партиясы Жетісу облыстық филиалының төрағасы Арыстанғали Арын.
Облыстық кәсіпкерлер палатасының директоры Дәурен Оңалбаев азаматтардың арыз-өтініштерін толық тыңдап, сауалдарына жауап беріп, түсіндірме жұмысын жүргізді. Сондай-ақ, қабылдау барысында көтерілген мәселелер бойынша барлық ақпарат кеңес отырысында қаралып, тиісті мемлекеттік органдарға ұсынылатын болады.
Облыстық кәсіпкерлер
палатасы
