Сарқан қаласының тұрғыны Айдар Барлыбаевты шаруашылықпен айналысатын жанның дені біледі.
«Айдар» шаруа қожалығын құрып, еділбай қойын өргізіп отырған малсақ жан екі отбасын тұрақты жұмыспен қамтып отыр. Айдар Сансызбайұлы бастапқы кезде осы тұқымды өңірде жерсіндіруді әрі мал басын арттыруды мақсат тұтты. Сөйтіп, 2007 жылы Семей қаласынан 300 бас еділбай тұқымды тоқты, 110 ешкі сатып алып, шаруашылықтың негізін қалады. Қазіргі кезде отар-отар қой-ешкісі көбеюде.
Қарауындағы отарының қыстан қысылмай шығуы үшін шөбін маялап, қажетті жемін дайындап алады. Көктемгі мал төлдету маусымы биыл да қауырт жүрді. Сәуір айының басында сақпан басталып, бағымындағы қойлардан жоспарлаған қозы алынды. Төрт түліктің төлі өсіп, мал басының артуы құт-берекенің бастауы ғана емес, толайым табыстың да нышаны. Шаруашылық иесі Айдар Барлыбаевты толғандырар мәселе көп.
– Қазір біз мал өсіріп, төлін сатудамыз. Өкінішке қарай, мал жүнін түгел қоқысқа тастаймыз. Өйткені оны сақтағаннан пайда жоқ. Біріншіден, көп тұра берсе жағымсыз иіс шығады. Екіншіден, жүн бағасы арзан. Қазір бір қой мың теңгеге қырқылады, ал қой жүні 50 теңге. Шикізатты облыс орталығы Талдықорғанға апару өзін-өзі ақтамайды. Сондықтан оны қоқысқа тастауға мәжбүрміз. Негізі оны кәдеге жарата білсек денсаулыққа пайдалы өнім. Мал төлін де өткізе алмаймыз. Өйткені, оны қабылдайтын орын жоқ. Арадағы делдалдар да өз пайдасын ойлайды, – дейді Айдар Барлыбаев.
Сондай-ақ, ол былтырғы маусым айында агроқаржы корпорациясы арқылы 55 аттың күші бар қытай тракторын, содан соң шөп тиейтін отандық агрегат сатып алғанын айтты.
Жақсылық ЖОМАРТҰЛЫ
Сарқан ауданы
