Жазбен бірге Жер – Ананың да тынысы ашылды. Шаруа баққан елдің маңдайынан тер, қолынан қайрат кетпейтін нағыз бір шақ – егіс науқаны. Бұл жолы да Көксу жұрты жерді иітіп, дәнді сеуіп, тіршіліктің тамырына қан жүгіртті.
Биылғы жылдың көктемінде аудандағы 31 382 гектарға жуық жерге ауылшаруашылығы дақылдары егілген. Қай-қайсысы да елдің азығы, жұрттың нәсібі. Ең көп орын алған дәнді дақылдар. Бидайы – білекке серік, арпасы – малдың қорегі, жүгерісі – жаңа заманның сұранысы. Барлығы 10 500 гектар жерге жайғасыпты. Бұған қоса, майлы дақылдар 11 478 гектарға егілген. Майбұршағы мен күнбағыстың да жайқалып тұрғаны еңбек пен уақыттың босқа кетпегенінен хабар береді. Ал 1 822 гектар алқапқа егілген қант қызылшасы – Көксу даласының тәтті үмітіндей.
Аудан әкімі Дәулет Халелов бастаған бір топ сала мамандары алқаптарды аралап, егіннің шығымымен танысты. Мұндай сапар жердің үнін тыңдау, диқанның мұңын ұғу, өнімнің өресін болжау.
Сапар барысында Мұқырының қоңыр топырағында тамыр жайған қызылша мен құнарлы топырақта жайқалған майбұршақ, Балпық бидің теріскейінде жайқалған бидай және Лабасыдағы көсілген жүгері алқаптары жіті назарға алынды.
Әр алқап өзіне тән тыныс, әр шаруа өзіне тән тәсіл. Бірақ бәрін біріктіретін бір-ақ ұғым – еңбек. Шыны керек, бүгінде аграрлық сала ескіше қара кетпенмен емес, тың тәсіл, жаңа үлгімен жүзеге асырылатын күрделі жүйе. Сондықтан аудан басшысы диқандарға суғару, тыңайтқыш беру, зиянкеске қарсы шаралар сынды агротехникалық талаптарды қатаң сақтау керектігін қадап айтты. Бұл берекелі өнімнің алғышарты екенін ұмытпаған жөн.
Көксу ауданы жер жомарттығы мен ел еңбекқорлығын бір арнаға тоғыстырған мекен. Бұл өлкеде бір түйір дән де ескерусіз қалмайды, себілген әрбір тұқым ертеңгі ырыстың бастауы. Ауылшаруашылығы мұндағы экономиканың алтын өзегі, елдің еңсесін тіктейтін іргелі тірек. Сондықтан да топыраққа түскен тер халыққа айналар нәсіп екенін ескерген жөн.
Аружан ЖАҚЫП,
Көксу ауданы әкімінің баспасөз хатшысы
