Өлкеміз картоп, жүгері, қант қызылшасын өсіруде басқа облыстарға қарағанда көш бастап тұр. Алайда, осы дақыл түрлерін өңдеу ісі кенжелеп келеді. Кейінгі жылдары қант қызылшасын игілікке асыруда жақсы нәтижелерге қол жеткіздік. Міне, енді картоп өнімдерін өңдеу ісі қарқын алатын болды. Бұл туралы облыс әкімі Амандық Баталовтың «Farm Frits Kazakhstan» ЖШС өкілдерімен кездесуінде сөз болып, бірлескен жобаны жүзеге асыру мәселелері талқыланды.
Кездесу барысында облыс Yкімінің орынбасары Жеңіс Тұяқов жобаның жүзеге асырылу барысы туралы баяндады.
Оның айтуынша, голландық компаниямен арадағы картоп өңдейтін зауыт құру туралы келісімдер 2016 жылдың тамыз айында басталыпты. Содан бері біраз шаруаның басы қайырылған. Бүгінгі күні Іле ауданындағы «Береке» индустриалды аумағында зауыт құрылысын салуға 25 гектар жер бөлініпті. Сондай-ақ, компания мен мемлекеттік органдар және қаржы институттары арасындағы бірлескен жұмыстар сәтті жалғасуда.
«Кеңесіп пішкен тон келте болмайды» дегендей, бірнеше жылдан бергі түрлі кездесу арқылы иіні қанған жобаның келешегі де кемелді болатыны анық. Бұл тұрғыда компания өкілі, жоба жетекшісі Йос дэн Боэр қазақстандық әріптестерінің іскерлігіне ризашылығын білдірді. Ол зауыт құрылысын жоспарлы жүргізу үшін қазақстандық «Евразия» компаниялар тобымен серіктес болып, бірлескен қызмет туралы келісімшартқа қол қойылғанын жеткізді.
Қос тараптың пікірін толық тыңдаған Амандық Ғаббасұлы картопты өндірістік деңгейде өсіру ауылшаруашылығының басым бағыттарының бірі екеніне тоқталды. Расында, бұл бағыттағы жұмыс облыста қарқынды түрде атқарыла бастады. Айталық, биыл Райымбек ауданында «Жетісу» ҸКК арқылы картоп шаруашылығын дамытудың сервистік-дайындау орталықтары құрылып, қажетті техника сатып алынған. Олар сәуірде гектарына 350 центнерден өнім беретін голландиялық сорттың 240 тонна сапалы тұқымын отырғызады. Сонымен қатар, Қапшағай қаласы картоп өсіруді дамытуда мол мүмкіндікке ие. Ал голландық компаниямен бірлесіп атқарылатын жоба жергілікті тұрғындарды тұрақты жұмыспен қамтуға және диқандардың өнімін өткізуге тиімді көмек болатыны анық. Бірлескен жобаның осындай игілікті тұстарын атап өткен өңір басшысы:
– Облыста қант қызылшасы мен жүгері шаруашылығы жақсы дамып келеді. Мемлекет қолдауының арқасында ауылшаруашылығын дамытуға барлық жағдай жасалған. Бізде шаруалардың шикізаттарын қабылдап, дайын өнім шығаратын зауыттар бар. Сондықтан осындай ірі зауыт ашылатын болса, өңірдегі картоп өндірісін дамытуға ықпал етер еді, – деді.
Картоп өңдейтін зауыттың құрылысын салу жұмысы келесі жылдың сәуір айында басталады. Ал 2020 жылдың қазанында алғашқы өнімін жұртқа ұсынбақ. Айта кетерлігі, компания тек картоп өнімдерін өңдеумен ғана емес, дақылды өндірумен де айналысады.
Қажет АНДАС
