Облыста ет өндірісі белсенді дамып келеді. Қазір аймақта 72 мал бордақылау алаңы жұмыс істейді.
Жыл басынан бері агросфераға салынған инвестиция көлемі 540 млн. теңгені құрады. Ақсу ауданында қазір 100 мыңға жуық ірі қара мал басы бар. Осыған байланысты онда ет және қайта өңдеу бағытындағы экспортқа бағдарланған кешендер желісі ашылуда. Қазір бордақылау алаңында 700 бас ірі қара бағылуда. Негізінен абердин-ангус пен қазақтың ақбас сиырына басымдық беріледі. Бұл климаттық белдеуде олар ойдағыдай бейімделіп, күтім кезінде жақсы салмақ қосады.
– Бізде құрама және теңдестірілген жемшөп сүрлем мен дәнді және күнбағыс жомы түріндегі табиғи қоспаларға негізделген. Осының арқасында мал салмақ ұстайды. Әр 20 күн сайын әр бұқашықтың қанша келі қосқанын өлшеп, бақылап отырамыз, – дейді зоотехник Ерлан Данабатыров.
Кәсіпорынға өз қаражатынан басқа, бордақылаумен айналысатын кәсіпорындарды қолдаудың мемлекеттік бағдарламасы бойынша жарты миллиард қарыз қаражаты салынды. Келешекте ет комбинатын салу үшін тағы миллиард теңгеге жеңілдікті несие алу көзделген. Кәсіпорын жетекшісі Азат Көпжасаров, сондай-ақ, бордақылау алаңы экспортқа арналған бордақылаудың зәкірлік өндірісі болатындай етіп ұйымдастырылғанын айтты.
– Өткен жылы біздің фермерлер 12 мың тонна ет өндірді. Биылғы көрсеткішті 15 мың тоннаға дейін арттыруды жоспарлап отырмыз. Қазір тағы бірнеше бордақылау алаңдарын ашуға өтінімдер бар, – дейді Ақсу ауданы әкімінің орынбасары Ғазиз Есжанов.
Былтыр өңірдің бордақылау алаңдарында 19 мыңнан аса ірі қара мал бағылып, 13 мың тонна ет өндіріліп, 3 мыңнан аса ет экспортқа жіберілді. Облыстық ауыл шаруашылығы басқармасы өкілдерінің айтуынша, қазір шетелден тек отандық сиыр етіне ғана сұраныс артуда. Өткен жылы ірі қарадан басқа, Өзбекстан, Қырғызстан және Ресейге жылқы мен түйе еті экспортталған.
– Қазір мал шаруашылығымен айналысатындар үшін мемлекет тарапынан айтарлықтай қолдау бар. Несиелер субсидиялаудың жеңілдікті мөлшерлемесі бойынша 2,5%-бен беріледі. Бұдан басқа, «Бәйтерек» холдингі арқылы қаржыландырылатын көптеген бағыт бар. Бұл біздің мал өсірушілерімізге жақсы көмек. Осының арқасында былтыр ауыл шаруашылығы саласына 47 млрд. теңге инвестиция құйылды. Өткен жылдармен салыстырғанда, өсім 2,5 есеге жуық, – дейді облыстық ауыл шаруашылығы басқармасы басшысының орынбасары Данияр Ысқақ.
Биыл құс етін өңдейтін кәсіпорындар желісін, балық шаруашылықтарын, сондай-ақ, құрамажем өндіретін зауыттар ашу жоспарда бар. Инвестицияның жалпы сомасы 113 млрд. теңгеден асады.
Айгүл БАЙБОСЫНОВА
Ақсу ауданы
