Отандық өнеркәсіпті ынталандыру аясында QazIndustry кәсіпорындардың еңбек өнімділігін арттыруға және өнімді ішкі нарықта ілгерілетуге бағытталған шығындарын өтеуді жалғастыруда, – деп хабарлайды 7-su.kz ақпараттық порталы.
«QazIndustry» Қазақстандық индустрия және экспорт орталығының мәліметінше 2025 жылдың қорытындысы бойынша мақұлданған өтінімдердің жалпы сомасы 1,4 млрд теңгеден асты. «2025 жылдың қорытындысы бойынша отандық кәсіпорындарға 1,4 млрд теңгеден астам сомаға шығындарының бір бөлігі өтелді. Мемлекеттік қолдауға 60 кәсіпорын ие болды», – делінген хабарламада. Қаражаттың негізгі бөлігі еңбек өнімділігін арттыруға, технологиялық процестерді жетілдіруге, өндірісті жаңғырту мен цифрландыруға, жабдықтар сатып алуға және персоналды оқытуға бағытталған.
Ең көп өтінімдер Астана, Алматы, Шымкент қалалары мен Алматы, Павлодар, Қарағанды және Түркістан облыстарының машина жасау, металлургия, АӨК, жиһаз және құрылыс материалдарын өндіру салаларынан түскен. Бұдан басқа, кәсіпорындар сертификаттау, зертханалық сынақтар мен аудит шығындарын өтей алды, ал аяқ киім өндірушілеріне таңбалау шығындары өтелді.
Биыл бизнесті ынталандыру қағидаларына маңызды өзгерістер енгізілді. Қазақстанда алғаш рет кәсіпорындардың тауарларды ел ішінде теміржол арқылы жеткізуге кеткен шығындарының 50%-ы өтеледі, ал халықаралық сертификаттау шығындарын өтеу мөлшері 15 мың АЕК-ке дейін, яғни бес есе көбейді. Сонымен қатар, салық динамикасы бойынша шарттар жеңілдетіліп, салықтардың өсу талаптарынан босату мерзімі 3 жылдан 7 жылға дейін ұзартылды. Мұндай шара кәсіпорындарға шығындарды өтеу құқығын сақтай отырып, толық қуатқа шығуға қосымша уақыт береді.
