Аудандық ауыл шаруашылығы бөлімінің басшысы Ермек Қонақбаевтың айтуынша, жүгері жинау науқаны басталған қыркүйек айының алғашқы он күнінде 2 мың гектардан аса алқаптың өнімі орылып, алқаптардан қырмандарға 150 мың тоннаға жуық астық әкелінген. Ал кептірілгендері қабылдау кәсіпорындарына өткізілуде. Қазіргі қарқынмен әр гектардан жиналған дән орта есеппен 72 центнерден айналуда. Әзірге өнімділік жаман емес, былтырғымен салыстырғанда айтарлықтай жоғары. Сондықтан, алқаптардағы жүгерінің дән ұстауы мен бітік болуы биыл да мол өнім жинауға негіз қалап отыр.
Жүгері жинау жұмысының бәрі техника күшімен атқарылады. Биыл ауданда жүгері собығындағы дәнді бірден уатып, оратын жалпы 33 «Джон Дир» комбайны қатысуда. Оларға дән тасымалдайтын 100 «КамАЗ» жүк көлігі тіркемесімен, алқаптардан собықпен оратын «Херсон-9» комбайндарына 65 трактор тіркемесі әзірленген. Науқанға қатысатын барлық техника алдын ала тыңғылықты жөндеу мен баптаудан өтіп, жанар-жағармай және қажетті қосалқы бөлшектер дайындалған.
Жаркент өңірі егіншілерінің негізгі тіршілігі «дала аруын» өсірумен байланысты болғанымен де бұл жердегі халықты азық-түлікпен қамтамасыз етуге қажет басқа да өнімдер аз емес. Мәселен, биыл диқандар 227 гектар жерге жаздық бидай өсіріп, әр гектарынан 16 центнерден дән жинады. Сол сияқты 141 гектарға арпа өсіріліп, әр гектарынан 12,5 центнерден өнім алынды. Өңірде жалпы 18787 гектардан аса алқапқа көпжылдық шөп өсіріліп, одан қыс маусымына 398,2 мың тонна жоңышқа,19 мың тоннадан аса пішендеме, 18 мың тонна сүрлем дайындалды.
Мал азығын дайындау әлі де жалғасуда. Картоп, көкөніс, бақша, жеміс-жидектен де мол өнім жиналды. Ауданда жалпы 25 арнайы жасақталған қырман бар. Олар науқан басталмай тұрып тазаланып, дақыл дәнін қабылдауға сақадай сай дайындалды.
М. МАНАПҰЛЫ
