Сарқандық диқандар күзгі жиын-терінді табысты аяқтады. Жаздағы аптап ыстық пен қолайсыз ауа райына қарамастан бел жазбай еңбек етіп, қиындықты еңсере білді.
Көктем айларындағы егін егу науқанында шаруалар 52 585 гектар жерге күздік бидай, жаздық бидай, жаздық арпа, дәндік жүгері, қарақұмық, сұлы, тары сияқты ауыл шаруашылығы дақылдарын егіп, күзде орғанын кәдеге жаратқан болатын. Дала төсін дүбірге толтырған еселі еңбек пен ала жаздай төккен тердің арқасында шаруалар күздік бидайдың гектарына 15,6 центнерден өнім алса, жаздық арпаның гектарына 22 центнерден түсім жинады. Жер жайын жетік білетін өңір диқандары бұдан бөлек 7001 тонна картоп, 3700 тонна бақша өнімдері, 667 гектар алқаптан 23 683 тонна көкөніс, 4 812 гектар алқаптан 40 805,9 тонна дәндік жүгері, 29 453,5 гектарға орналастырылған майлы дақылдардан 71 123,2 тонна өнім алып, ел экономикасын еселеуге айтарлықтай үлес қосып отыр. Басты дақыл болып саналатын 3801,6 гектар алқаптан 152 149,25 тонна қант қызылшасын жинап, оның 135 916,25 тоннасын Ақсу қант зауытына өткізіп, облыста балтамыр өткізуден бірінші орын алды.
Күзгі жиын-терін жұмыстарын аяқтаған егіншілер алдағы жылдың өнімі үшін дайындалған 13 000 гектар жерге күздік бидай тұқымын сеуіп, 23 500 гектар алқапқа сүдігер жыртып, көктемгі науқанға ерте қамданды.
Суармалы су тапшылығы жыл өткен сайын күрделеніп тұрған шақта ауданның агросекторын тұралатпай, инновациялық тәсілдерді пайдалану арқылы суды үнемдеу технологияларын белсенді ендіруді мақсат тұтқан шаруалар бұл бағыттағы жұмыстарды бастап та кетті.
Жақсылық ИГІМАН
Сарқан ауданы
