Ақсулық фермер 230 гектар жерге тамшылатып суару технологиясын орнатып, ауыл- шаруашылығы дақылдарын өсіріп отыр. Оған фермер 300 млн. теңгеден аса инвестиция салған. Келесі жылы су үнемдеудің осы технологиясы қолданылатын алқап көлемін 330 гектарға жеткізбек.
Биыл Ақсу ауылдық округіне қарасты Шолақ-өзек ауылында «Жаныс-К» ЖШС тамшылатып суару технологиясын енгізді. Серіктестік директоры Ғалбиат Самарқанның айтуынша, 130 гектар жерге қант қызылшасын, 100 гектарға дәндік асқабақ, күнбағыс, жүгері дақылдарын еккен. Ол дәстүрлі суару әдісімен салыстырғанда мұнда су 60% үнемделетінін айтады. Оған қоса, әр дақылдың түбіне су тамшылап баратын болғандықтан, басы артық арамшөп өспейді. Сондықтан да бұрынғыдай шөптеуге, түптеуге қол күші қажет емес.
– Осы округте 7 жылдан бері жермен жұмыс істеп келемін. Жаңа технология енгізу жұмысын атқаруды біраз уақыттан бері жоспарлап жүр едік. Биыл білек сыбана кірістік. Қытайдан арнайы құрылғыларын әкеліп, орнаттық. Құрылғыны сатып алған компанияның бір маманы келіп, технологиямен жұмыс істеудің жай-жапсарын түсіндіріп кетті. Қазір жақын маңдағы ауылдардың тұрғындарынан 8 адам тұрақты еңбек етуде. Маусымдық кезеңде қосымша 20 шақты жұмысшы тартылады. Биыл осы озық технологияның арқасында қант қызылшасының 1 гектарынан 800 центнерден өнім алуға мүмкіндігіміз бар, – дейді серіктестік басшысы.
Серіктестік 5 трактор сатып алған, соның 3-еуіне арнайы GPS агронавигатор орнатылған. Енді бұл тракторларда рульде отыратын тракторшы қажет емес, тек оператор арнайы мониторды бақылап отырса жеткілікті. Сол сияқты шаруашылыққа электр жарығы тартылып, 5 су ұңғымалары қазылған. Облыстық ауылшаруашылығы басқармасының мәліметіне қарағанда, биыл су үнемдеу технологиясын Ақсу ауданында 16 шаруа қожалығы 2 107 гектар жерде іске асыруда, оның 1 622 гектары жаңбырлатып, 485 гектары тамшылатып суару әдісін қолданып отыр.
Ал жалпы облыс бойынша өткен жылы су үнемдеу технологиясын қолдану 1,3 мың гектарға артып, 9,3 мың гектарға жеткізілсе, осы жылы 21,9 мың гектарға ұлғайтылып, 31,2 мың гектарға арттыру көзделіп отыр. Еске салсақ, су үнемдеу технологиясын орнатудың және су тарифі шығынына мемлекет тарапынан субсидия беріледі.
Жетісу облысы
әкімінің баспасөз қызметі
