2021 жылдан бастап Қазақстанда әкімдіктер, жұмыс берушілер мен кәсіподақтар арасында үшжақты келісімдер жасала бастады.
Мұндай үшжақты меморандумдар барлық мүдделі тараптардың іс-қимылдарын үйлестіруді арттыруға, мұқтаждарды жедел жұмыспен қамтамасыз етуге, қызметкерлер мен жұмыс берушілердің құқықтарын қорғауға, ықтимал жанжалды жағдайларды болдырмауға мүмкіндік береді. Облыстық келісім жасасудың негізгі мақсаты кәсіпорындардағы әлеуметтік және еңбек қатынастарын реттеу.
Жақында 2024-2026 жылдарға арналған осындай келісімге республикалық деңгейде де қол қойылды, енді оларды аймақтарда жасаудың уақыты келді. Қол қою рәсімі облыс әкімдігінің ғимаратында өтті. Салтанатты жағдайда «Paryz» ҚР жұмыс берушілер (кәсіпкерлер) ұлттық конфедерациясының бас директоры Айдос Әбіханов, «Алматы облысының кәсіподақ орталығы» аумақтық кәсіподақтар бірлестігінің төрағасы Әсет Қыдырманов және Жетісу облыстық жұмыспен қамтуды үйлестіру және әлеуметтік бағдарламалар басқармасының басшысы Ермек Мизамбаев қолтаңбаларын құжатқа қойды. Ермек Арынханұлы да осы кездесудің модераторы болды.
Барлық құжатқа қол қойылғаннан кейін біз Айдос Әбіхановпен тілдестік.
– Бүгін кезекті өңірлік келісімге қол қойылды. Біз оның ережелерін серіктестерімізбен 3 ай бойы талқыладық. Құжатқа сәйкес жақында іс-шаралар жоспары әзірленеді. Бұл меморандумды барлық серіктес тараптар сақтауға міндетті. Біз жұмыс берушілердің жағын ұсынамыз. Құжаттың маңыздылығы сол – Еңбек кодексінен кейін бірден жүреді. Келісімге енгізілген ережелер Еңбек кодексіне сәйкес қызметкерлердің жағдайын нашарлата алмайды, керісінше, ол жақсарту үшін жұмыс істейді, – деді Айдос Әбіханов.
Сондай-ақ, ол келісімнің 7 негізгі бағыттан тұратынын айтты. Олардың негізгілері еңбекті қорғау, еңбек қауіпсіздігі, еңбек жанжалдарының алдын алу, әлеуметтік әріптестік және жалпы еңбек нарығын дамыту. Құжат әлеуметтік серіктестікті дамытудағы маңызды қадам.
Айгүл Байжұмақызы
