Алакөл ауданына «Айтуға оңай» бағдарламасының жүргізушісі, журналист Бейсен Құранбек келіп, «Жақсы жұмысқа орналасудың қыр-сыры» тақырыбында жастармен шеберлік сыныбын өткізді. Аталмыш семинарға жұмыс іздеп жүрген жастар қатысты. Мұнда бүгінгі күнгі жұмыссыздық мәселесі, сондай-ақ жақсы жұмысқа орналасудың қыр-сыры туралы Бейсен Құранбек өзінің ойымен бөліссе, ал жастар көкейлерінде жүрген сауалдарын қойып, оған дәлелмен жауап берілді. Өмірдегі болып жатқан көптеген мәселелерден нақты мысалдар келтіріп түсіндіруі мен тақырып төңірегіндегі ойлары бәрімізді толғандырды.
Танымал журналистің сөзінен өзіме түйгенім көп. «Ел боламын десең, бесігіңді түзе» демекші, бүгінгі жақсы жұмыс – жақсы тұрмыстың кепілі. Оның тамыры ең әуелі мамандық таңдаудан басталмақ. Көп жастар тек мемлекеттік грантқа түсуді ғана ойлайды. Ал шын мәнінде өзінің қызығатын мамандығына түсе бермейді. Төрт жыл табан аудармай қызықпайтын оқуды оқып, бекер босқа уақытын өткізуден ең үлкен ағаттық бастау алып жатады. Адам өзі қызықпайтын кәсібінен ләззат алып, бақытты болмайды. Қорытып айтқанда, өз бойыңыздағы қабілетіңіз бен қызығушылық сезіміңізді шынайы ұштастыра білмесеңіз жақсы жұмысқа орналасып, табысқа жете алуыңыздың неғайбыл екенін аңғарғаныңыз дұрыс. Сондай-ақ, әрбір адам өзіне немқұрайды қараудан, өзін төмен бағалаудан, қорқыныш, үрей шеңберінен шыға алмаса, жалқаулық, кертартпалық, ұйқышылдықты өзіне серік етсе, оның ертеңі де бұлыңғыр.
Қолдағы бар байлықтың қадірін біліп, уақытпен жарысып жұмыс жасаңыз. Мейрім, сүйіспеншілік, білім, еңбек, иманды өзіңізге арқау ете білсеңіз, алынбайтын қамал болмас, сірә. Елім деп еміреніп, тілім деп тебіреніп, ұлттық рухың мен жігеріңді жалындатып жалықпай еңбек ету шын бақытқа жетелейді. Ол үшін ең әуелі өз-өзіңе жауап бер. Елбасымыз айтпақшы, мен елден не алам деп емес, мен елге не берем» деген ұлы идеяны алға ұстар ұран етуіңіз тиіс. Бабалар аманатын арқалап, ұлы кемеңгерлеріміздің керемет сөздерін жанымызға сақтап, ұлағатты ұрпақ тәрбиелей алсақ болашағымыз нұрлы, тәуелсіздігіміз тұғырлы.
Нүсіпқан ҚАДЫРСҰЛТАН.
Алакөл ауданы.
