Облыста алғаш рет ұйымдастырылған «Бақ – Береке» кәсіпкерлер форумы өңірдегі іскер қауымын бір алаңға жинады. Қазақстан іскер әйелдер қауымдастығының 30 жылдығына орай «Атамекен» Ұлттық кәсіпкерлер палатасының алаңында өткен шарада бизнес, білім және қоғамдық даму тақырыптары жан-жақты талқыланды.
Форумды облыстық іскер әйелдер қауымдас- тығының төрайымы Анель Кәпекова ашып, бүгінгі таңда әйелдер кәсіпкерлігі ел экономикасының маңызды бөлігін қалыптастырып отырғанын атап өтті.
– Мақсатымыз – бизнес иелерін біріктіріп, тәжірибе алмасуға, жаңа идея тудыруға мүмкіндік беру. Қауымдастықтың 30 жылдық мерейтойы тек тарих емес, жаңа белестердің бастауы, – деді.
Кездесуге арнайы шақырылған спикерлер толғақты мәселелерді қаузап, маңызды ұсыныстарымен бөлісті. Солардың қатарында коммуникация саласының сарапшысы Меруерт Жүнісбек кәсіпкердің 70 пайыз табысы коммуникация сапасынан келетінін тілге тиек етіп, кәсіпкерлердің жеке брендін, сөйлеу мәдениетін, аудиториямен байланыс орнату тәсілдерін түсіндірді.
– Бүгінгі нарықта клиент сенетін адаммен жұмыс істейді. Сіздің сөзіңіз, дауыс ырғағыңыз, өзіңізді ұсынуыңыз – бизнесіңіздің құрамдас бөлігі. Кәсіпкер үшін ораторлық қабілет жай дағды емес, табыстың тікелей факторы, – дейді спикер.
Бухгалтерлік қызметтер орталығының негізін қалаушы Сандуғаш Шаймерден «Қаржы сауаттылы- ғы – бизнес тұрақтылығының негізі» деген тақырыпта сөйлеп, шағын және орта бизнес иелеріне қаржылық жоспарлау, салық жүйесі және бухгалтерлік есептің маңызды қырларын түсіндірді.
– Қазақстанда кәсіп бастайтындардың көпшілігі өнімді ойлайды, бірақ қаржылық модельді ойламайды. Табысты кәсіптің негізі – дұрыс есеп, таза қаржы, нақты жоспар, – деп сөзін қорытты.
Талдықорған политехникалық колледжінің директоры Шыңғыс Нұрғожай жастармен жұмыс, дуалды білім беру, IT және инженерлік мамандықтарды дамыту жайлы сөз қозғады.
– Бизнес пен білім бір-бірінен бөлек болмауы керек. Кәсіпкерлер университетпен бірігіп жұмыс істеуі арқылы жаңа кадр даярлауға үлес қосады, – дейді ол.
«Альянс Стратег Орталық Азия» бизнес клубының негізін қалаушы, кәсіпкер Азамат Сәрсембаев қатысушыларға мотивациялық баяндама жасап, өзінің бизнестегі қателіктері мен жетістіктерімен бөлісті.
– Табысты кәсіптің формуласы – батылдық, зерттеу, команда және қоғамға пайда әкелу. Егер бизнес тек ақша үшін жасалса, өмірі қысқа болады, – деді тәжірибелі кәсіпкер.
Форум барысында өңірдің белсенді кәсіпкерлері нақты бизнес-кейстері мен шынайы тәжірибелерін ортаға салып, қатысушыларға мотивациялық серпіліс сыйлады.
Қатысушылар диалог секцияларында бизнес жүргізудегі қиындықтар, инвестиция тарту, маркетинг стратегиясы, әйел кәсіпкерлігінің даму перспективаларын талқылады.
Қысқасы, облыс кәсіпкерлерін біріктіріп, жаңа серіктестіктерге жол ашқан форум қатысушыларына алғыс білдіріліп, келесі жылы да жалғасатыны хабарланды.
Қажет АНДАС
