Жетісу облыстық мәслихаттың кезекті ХXXIV сессиясы өтті. Онда тоғыз мәселе қаралды.
Сессия барысында Қазақстан Республикасының «Құқықтық актілер туралы» Заңының 27-бабының 2) тармағына сәйкес, Жетісу облыстық мәслихатының 2023 жылғы 20 маусымдағы №4-31 шешімінің күші жойылды. Нәтижесінде Қазақстан Республикасының «Автомобиль көлігі туралы» Заңына сәйкес «Жетісу облысының әлеуметтік маңызы бар қатынастарының тізбесін айқындау туралы» жаңа шешім қабылданды.
Сонымен бірге, ортақ су пайдалану ережелері жаңартылып, қолданыстағы заңнама талаптарына сәйкестендірілді. Терроризмге қарсы және құқықбұзушылықтың профилактикасы жөніндегі комиссиялардың дербес құрамына да өзгеріс енгізілді. Сессияда сондай-ақ, «Қазақстан Республикасындағы жергілікті мемлекеттік басқару және өзін-өзі басқару туралы» Заңына сәйкес мәслихат төрағасының 2025 жылы мәслихат қызметін ұйымдастыру бойынша атқарған жұмысы мен тұрақты комиссиялардың есепті кезеңдегі қызметтері тыңдалды.
Белгілі болғандай, өткен жылы облыстық мәслихат депутаттары 227 депутаттық сауал жолдап, тұрғын үй-коммуналдық, әлеуметтік, ауыл шаруашылығы, индустриялық-инновациялық мәселелер мен құқықтық тәртіптің жақсаруына өз үлестерін қосқан. Бұған қоса, депутаттар азаматтардың өтініштері мен шағымдарын қарастырып, мониторинг жұмыстарын жүргізген. Жыл басынан бері 587 нысанға мониторинг жасалып, әлеуметтік, инфрақұрылымдық және білім беру салалары қадағаланған. Анықталған кемшіліктер бойынша тиісті басқармаларға талаптар жолданған.
Депутаттар қоғамдық қабылдаулар өткізуді де жүйелі жүргізген. Барлығы 212 қабылдау барысында 427 азамат қабылданып, өзекті мәселелер қаралған. Сессияда облыстық мәслихаттың тұрақты комиссияларының өткен жылғы атқарған қызметтері баяндалды. Бұл туралы облыстық мәслихаттың экономика, бюджет, құқықтық тәртіп, сыбайлас жемқорлыққа қарсы күрес, депутаттық өкілеттіктер мен этика мәселелері бойынша тұрақты комиссия төрағасы Римма Салықова баяндама жасады.
Облыстық мәслихат қызметінің ашықтығын қамтамасыз ету мақсатында депутаттар 2025 жылғы есепті кезеңде әлеуметтік желілерде жалпы саны 3090 жазба жариялаған. Сонымен бірге, ақпараттық сүйемелдеу аясында мерзімді басылымдарда 33 мақала басылып, теледидардан 30 бейнематериал көрсетілген.
Соңында күн тәртібіне сәйкес облыстық мәслихаттың 2026 жылға арналған жұмыс жоспары бекітілді.
Айгүл БАЙБОСЫНОВА
