Бұл үрдіс Қазақстанды да айналып өткен жоқ, – деп хабарлайды 7-su.kz ақпараттық порталы 24.KZ сайтына сілтеме жасап.
Соңғы жылдары Қазақстанда кофе тұтыну көлемі еселеп өсіп келеді. Бір қызығы, ел тек импорттаушы ғана емес, сонымен қатар кофе экспорттайтын мемлекеттердің қатарына кіреді. 2024 жылдың қорытындысы бойынша кофе экспорты екі есеге өсіп, 6,96 млн долларға жетті. Сыртқы нарықтағы сұраныстың артуына Ресей, Тәжікстан және Моңғолия елдерінің қызығушылығы әсер еткен. Сонымен қатар, қазақстандық кофе Францияға да экспорттала бастады. Бұған дейін өнім Өзбекстан, Әзербайжан, Молдова және Грузия елдеріне жеткізіліп келген.
Импорт көлемі де жоғары қарқынмен өсіп отыр. Өткен жылы Қазақстан шетелден 47 млн доллар көлемінде кофе сатып алған. Бұл алдыңғы жылмен салыстырғанда 67 пайызға көп. Әсіресе, Бразилиядан жеткізілетін кофе көлемі екі есеге өсіп, 8 млн долларды құрады. Негізгі жеткізушілер қатарында Ресей, Италия, Эфиопия және басқа да елдер бар. Ал Угандадан келетін кофе көлемі керісінше азайған.
Жалпы алғанда, 2024 жылы Қазақстандағы кофе нарығының көлемі 54 млн доллардан асып, сауда айналымы 71 пайызға ұлғайған. Қазіргі таңда елде кофенің 50-ден астам түрі сатылымда бар.
Экспорт құрылымына келсек, негізгі үлес Ресейге тиесілі – 6,25 млн доллар немесе 89,8 пайыз. Одан кейін Қырғызстан – 323,2 мың доллар (4,6%), Моңғолия – 127,6 мың доллар (1,8%), Өзбекстан – 94,8 мың доллар (1,4%), Тәжікстан – 58,5 мың доллар (0,84%), Түрікменстан – 54,9 мың доллар (0,79%) және Әзербайжан – 47,8 мың доллар (0,69%).
Импорт құрылымында Бразилия көш бастап тұр – 15 млн доллар немесе 31,4 пайыз. Ресейден 14,4 млн доллар (30,2%), Италиядан 7,89 млн доллар (16,5%) көлемінде өнім әкелінген. Сондай-ақ Нидерланды – 1,4 млн доллар (2,9%), Эфиопия – 1,18 млн доллар (2,5%), Германия – 1,14 млн доллар (2,4%) және Колумбия – 889,7 мың доллар (1,9%) үлеске ие.
Осылайша, Қазақстанда кофе нарығы тұрақты өсім көрсетіп, тұтыну мәдениеті жаңа деңгейге көтеріліп келеді.
