Батыс Қазақстан облысында ұлттық тәрбие мен қоғамдық мәдениетті дәріптеуге арналған ауқымды жиын ұйымдастырылды, – деп хабарлайды 7-su.kz ақпараттық порталы.
Орал қаласында Қазақстан Халық Кеңесінің ұйымдастыруымен «Жаңа қоғамдық этика: мәдениет, әдеп, әдет» атты республикалық форум өтті. Аталған шара мемлекет басшысының тапсырмаларын жүзеге асыру аясында конституциялық органның өңірлерде өткізген алғашқы маңызды іс-шарасы болып табылады. Диалог алаңына мыңнан астам қоғам өкілі, белсенді аналар мен сала сарапшылары жиналды. Жиында Қазақстан Халық Кеңесінің Төрағасы Ерлан Қошанов қатысып, Президенттің арнайы құттықтау хатын оқып берді. Мемлекет басшысы өз үндеуінде Конституция еліміздің өсіп-өркендеуіне жол ашатын қастерлі құжат екенін атап өтті. Қазіргі күрделі уақытта мемлекеттігіміздің мыңдаған жылдық тарихы мен дәстүрін сақтай отырып, жұртымыздың бойына озық ойлы ұлтқа тән игі құндылықтарды сіңіру басты міндет саналады. Өркениетті ел болу үшін адал еңбек пен тазалық қағидаттарын әрбір азаматтың санасына сіңіру қажет. Ел көлемінде қолға алынған «Таза Қазақстан» жалпыұлттық бастамасы ұлт болмысының ажырамас бөлігіне айналып келеді.
Ерлан Қошанов Мемлекет басшысының реформалары нәтижесінде соңғы 7 жыл ішінде ел экономикасы мен әлеуметтік саласы айтарлықтай өзгеріске ұшырағанын жеткізді. Мәселен, еліміздің ішкі жалпы өнімі 181,7 млрд доллардан 306 млрд долларға дейін өсті, ал жан басына шаққандағы көрсеткіш 9,8 мың доллардан 15 мың долларға жетті. Сонымен қатар 25 тиындақ шақырым жол салынып, 1 300 жаңа білім ошағы бой көтерді. Жиын барысында қатысушылар әскери бөлімдердегі жағдайды жақсарту, жастарды жұмыспен қамту және кітап оқу мәдениетін көтеру сынды өзекті мәселелерді талқылады. «JOLTAP» сияқты әлеуметтік жобалардың тәжірибесін кеңінен қолдану арқылы аймақтардағы жұмыссыздықты азайту мүмкіндіктері сөз болды. Мұндай ашық диалог алаңдары қоғамдық сананы жаңғыртуға және азаматтық жауапкершілікті арттыруға мол мүмкіндік береді.
