Жетісу облысының Ескелді ауданында республикалық референдум аясындағы дауыс беру науқаны жоғары белсенділікпен өтуде. Таңертеңнен бастап аудан тұрғындары сайлау учаскелеріне келіп, елдің саяси өміріндегі маңызды оқиғаға өз үлестерін қосуда, – деп хабарлайды 7-su.kz ақпараттық порталы.
Аудан аумағында тұрғындардың еркін таңдау жасауына барлық жағдай қарастырылған. 35 референдум учаскесі жұмыс істеп, сайлаушыларды қабылдауда. Әрбір учаске қажетті техникалық құралдармен қамтамасыз етіліп, дауыс беру процесі заң талаптарына сай ұйымдастырылған.
Аудандық комиссияның мәліметіне сәйкес, референдумда 32 881 азамат дауыс беру құқығына ие. Солардың ішінде алғаш рет өз таңдауын жасайтын жастар да бар. Атап айтқанда, 18 жасқа толған 152 жас бүгін алғаш рет дауыс беріп, ел болашағына қатысты маңызды саяси процеске қатысуда. Жастардың бұл белсенділігі қоғамдағы азаматтық жауапкершіліктің артып келетінін көрсетеді.
Жергілікті тұрғындардың пікірінше, референдум – ел болашағына қатысты маңызды шешім қабылдауға мүмкіндік беретін демократиялық қадам. Сондықтан аудан халқы бұл саяси науқанға жауапкершілікпен қарап, белсенділік танытуда.
Жалпы, Ескелді ауданында референдум аясындағы дауыс беру процесі ұйымшылдықпен өтіп, тұрғындардың ел дамуына бейжай қарамайтынын айқын көрсетіп отыр.
