Құрманғали Нүсіпов бір кездері бұрынғы «Пенжім», қазіргі Атамекен ауылында еңбек жолын бастап, бүкіл саналы ғұмырын адал еңбекке арнаған жан. Жастайынан бригадирлік қызмет атқарып, зейнет жасына дейін тынымсыз тер төкті. Ел алдындағы елеулі еңбегімен танылып, ауылдастарының құрметіне бөленді.
Марқұм жары Әтуархан апаймен бірге ұл-қыз тәрбиелеп, оларды үкілеп өсіріп, әрқайсысын өмірден өз орындарын табуға жетеледі. Қызы Сара – осы ауылдағы А. Розыбакиев атындағы мектепте ұзақ жылдар математика пәнінен сабақ беріп, зейнетке шыққан тәжірибелі ұстаз. Ұлы Тұрар жоғары білімді, өз саласында абыройлы қызмет етіп жүрген маман.
Кіші қызы Майра ауылдағы «Бөбек» балабақшасында есепші болып еңбек етеді.
Келіндері де отбасылық тәрбие мен әдептің үлгісіндей. Назира мектеп директорының оқу ісі жөніндегі орынбасары, үлкен келіні Пенжім мектебінде ұстаз. Ортаншы келіні Жанар С. Асфендияров атындағы Қазақ ұлттық медицина университетінің ғылым кандидаты, кіші келіні – осы оқу орнының түлегі.
Құрманғали ата жай ғана ақсақал емес, ақынжанды, парасатты тұлға. Зейнетке шықса да ауылдың қоғамдық өмірінен тыс қалған емес. Ақсақалдар алқасының белсенді мүшесі, «Қазақ тілі» қоғамының төрағасы. Жастарға жол сілтеп, мектеп оқушыларына ақыл-кеңесін айтып, ұрпақ тәрбиесіне атсалысып келеді.
«Қарты бар үй – қазыналы үй» дейді дана халқымыз.
Құрманғали ата сол қазыналы қарияның нағыз өзі. Еңбегі ескеріліп, аудан, облыс әкімдіктерінің Құрмет грамоталарымен марапатталған. Ауылдың Құрметті азаматы атағына ие болған ардақты жан.
Бүгінде немере-шөбере сүйіп, ұрпағының қызығына бөленіп отырған Құрманғали атамызға зор денсаулық, ұзақ ғұмыр тілейміз!
Тоқтаргүл КИІЗБАЕВА
