Жетісу облысында кедергісіз орта қалыптастыру жұмыстары жалғасуда. Биылғы жылдың басынан бері 168 әлеуметтік инфрақұрылым нысаны бейімделді. Осылайша өңірде бүгінге дейін жоспарға сәйкес мемлекеттік мекемелер, білім беру, денсаулық сақтау, мәдениет, спорт нысандары қатарында бейімделген нысандар саны 628-ге жетті, — деп хабарлайды Жетісу облысы әкімінің баспасөз қызметі.
— Облыс басшысы Бейбіт Исабаевтың тапсырмасына сәйкес өңірде мүгедек жандар үшін әлеуметтік инфрақұрылымдарды қолжетімді ету бағытында кешенді жұмыс жүргізілуде. Биыл 168 әлеуметтік инфрақұрылым нысаны бейімделді, оған жергілікті бюджеттен 591,8 млн. теңге бөлінді. Жалпы Жол картасы аясында барлығы 1119 нысанды бейімдеу жоспарланса, бүгінгі күнге соның 628-і бейімделді. Қалған 491 нысанда бұл жұмыстар кезең-кезеңімен атқарылады. Осылайша 2027 жылға қарай өңірдің әлеуметтік инфрақұрылым нысандарын бейімдеу бойынша жоспарланған жұмыстардың көлемі толығымен аяқталады, — деді облыстық жұмыспен қамтуды үйлестіру және әлеуметтік бағдарламалар басқармасының басшысы Ермек Мизамбаев.
Бұдан бөлек, Халықты әлеуметтік қорғау саласындағы реттеу және бақылау комитеті Жетісу облысы бойынша департаментінің мамандары мүгедектігі бар азаматтар үшін объектілердің қолжетімділігін қамтамасыз етуді мемлекеттік бақылау шеңберінде биыл өңірде 95 тексеру жүргізіп, соның қорытындысында 70 субъект жалпы сомасы 9,6 млн. теңгеден астам әкімшілік жауапкершілікке тартылды.
— Біз талдықорғандық кәсіпкерлер арасында түсіндіру жұмыстарын жүргізіп келеміз. Сауда үйлерінің басшыларына да жиі құлаққағыс етеміз. Мәселен, «Шапағат» сауда үйі екінші қабатына және «Zeta» дүкенінің кіреберісіне екі көтергіш орнатқанын осындай жұмыстардың оң нәтижесі деуге болады, оған қоса пандусы да бар. Енді баяу қозғалатын және мүгедектер арбасында жүретін адамдар сауда үйіне қиналмай кіре алады. «Шапағат» сауда үйінің басшылығына осындай шараларды қолға алғаны үшін алғысымды білдіремін. Сауда объектілері мен өзге де мекемелердің құрылтайшыларынан мүгедектігі және ерекше қажеттіліктері бар жандардың нысанға кіріп-шығуына қолайлы жағдай жасауды сұраймыз. Азаматтардың бәрі үшін кедергісіз орта құру — біздің ортақ міндетіміз, — деді «ELSTAR» мүгедектер қоғамдық бірлестігінің басшысы, Талдықорған қаласы әкімінің мүгедектердің құқықтары жөніндегі кеңесшісі, мүгедек адамдардың инфрақұрылымға қолжетімділікті қамтамасыз ету жөніндегі мониторинг тобының мүшесі Вадим Друзин.
Сондай-ақ облыста «Инватакси» қызметі жолға қойылғанын атап өткен жөн. Бүгінгі таңда осындай 34 арнайы автокөлік бар, жыл басынан бері облыс бойынша аталмыш көлік қызметіне 60 мыңнан астам өтінім келіп түскен.
Жалпы Жетісу облысында қолжетімділікті кешенді түрде қамтамасыз етуге және кедергісіз орта құруға ерекше көңіл бөлінеді. Бұл ретте жаңа нысандарды салу кезінде мердігер ұйымдарға қолжетімді ортаны қамтамасыз ету қағидаларын сақтау бойынша нақты талаптар қойылады.
