Жетісу облысы құрылғаннан бері өңірдегі 18 колледжде 31 жаңа мамандық ашылып, оларда бүгінгі күні 1162 студент білім алуда. Бұл мамандықтар цифрландыру, «жасыл» экономика, өндірісті автоматтандыру, агроөнеркәсіптік кешен, инфрақұрылым, туризм және қауіпсіздік салаларының қарқынды дамуымен тікелей байланысты. Соның ішінде су шаруашылығы бойынша жаңа мамандыққа Көксу политехникалық коллежді де оқытып жатыр, — деп хабарлайды Жетісу облысы әкімінің баспасөз қызметі.
Облыстық білім басқармасының мәліметінше, облыс әкімінің тапсырмасымен өңір экономикасының 5 басым саласы ретінде өңдеу өнеркәсібі, энергетика және жаңартылатын энергия көздері, ауыл шаруашылығы, ақпараттық-коммуникациялық технологиялар, туризм индустриясы бойынша талдау жүргізіліп, «Жаңа мамандықтардың өңірлік атласы» әзірленген.
— Осы жұмыстың нәтижесінде трансформацияланатын, жойылып бара жатқан және аса тапшы мамандықтар айқындалып, өңірдің техникалық және кәсіптік білім беру ұйымдарында жұмыс берушілердің нақты сұраныстары негізінде бірқатар жаңа мамандықтар ашылды. Соның ішінде «Автоматтандырылған жобалау жүйелері», «Графикалық және мультимедиялық дизайн», «Мехатроника», «Қашықтан басқарылатын авиациялық жүйелер (дрондар)», «Қант өндірісі» сияқты басқа да бірқатар мамандықтар бар. Оларды оқытуға қажетті материалдық-техникалық базаны жақсартуға да тұрақты көңіл бөлініп отыр, — дейді облыстық білім басқармасының басшысы Дәурен Жүнісов.
Жаңа мамандықтар қатарында Жетісудың аграрлық саласына аса қажетті гидромелиорациялық жүйелерді бақылаушы-реттеуші мамандығы Көксу политехникалық колледжінде ашылды. Соңғы жылдары еліміздің бірқатар өңірінде орын алған ірі су тасқындары су шаруашылығы саласында мамандарға деген тапшылық бар екенін көрсеткен болатын. Су арнасын реттеу, бөгеттер мен каналдардың техникалық жағдайын бақылау кәсіби мамансыз жүзеге аспайды. Оған қоса аграрлық салаға түрлі жаңа технологиялар енгізу үшін де білікті кадрлар қажет. Сондықтан мұндай жаңа мамандықтың ашылуы ауыл шаруашылығын білімді мамандармен толықтыруға үлкен ықпал ететіні сөзсіз.
Осы орайда Көксу политехникалық колледжі «Қазсушар» РМК «Жетісу» филиалымен келісімшарт жасасқан.
— Білім беру үдерісі дуалды жүйе негізінде жүзеге асырылады. Мұнда студенттер көп уақытын өндірісте өткізеді. Филиалдың аудандық бөлімшелерінде тәжірибеден өтіп, оқу соңында «Гидромелиорациялық жүйені қараушы-реттеуші» біліктілігін алады. Бұл – дипломның тек қағаз күйінде қалмай, нақты еңбек нарығында сұранысқа ие болуына мүмкіндік беретін тиімді модель. Бүгінгі күні колледжде 361 студент жеті түрлі мамандық бойынша білім алса, соның ішінде «Гидротехникалық мелиорация» мамандығында 75 студент оқиды. Оқу бағдарламасы 11-сынып бітірген түлектерге арналған, оқу мерзімі – 10 ай, — дейді колледж директоры Базархан Дүйсебеков.
Жаңа мамандықты меңгеріп жатқан студенттердің бірі Аслан Атикенов пікірін білдірді.
— Менің бірінші мамандығым – қазақ тілі мен әдебиеті пәнінің мұғалімі. Біраз жыл мектепте жұмыс істедім, кейін ауыл шаруашылығы саласына ауысқанды жөн көріп, ауылға келдім. Мұнда су шаруашылығына мұрап жетіспейтіндіктен, осы мамандықты оқып жатырмын. Бұдан әрі қарай шаруашылықта инженер-гидротехник ретінде жұмысымды жалғастырамын. Бұл жерде біз суды тиімді пайдалану, суды қайталай қолдану, тамшылатып, жаңбырлатып, тұмандатып суару инновациялық технологияларын меңгеріп, басқа да қажетті білім алып шығамыз, — дейді ол.
Сондай-ақ колледжде жылыжай шаруашылығы мамандығы ашылғалы отыр. Жылыжай шаруашылығы аграрлық саладағы басым бағыттардың бірі болғандықтан, бұл мамандыққа да еңбек нарығында сұраныс бар. Қазір мамандық ашуды ұйымдастыру жұмыстары жүргізілуде. Теориялық және өндірістік сабақтарға қажетті барлық оқулықтар мен құрал-жабдықтар алынып, өткен жылы жылыжай салынған. Осылайша колледж заманауи технологияларды меңгеру арқылы сапалы әрі мол өнім ала алатын білімді мамандарды даярлауға әзір.
Жалпы, облыста 27 колледж жұмыс істесе, оның 21-і мемлекеттік, 6-ы жекеменшік. Оларда 2025–2026 оқу жылында 14 мыңға жуық студент білім алуда.
