Қазақстан Республикасы Өнеркәсіп және құрылыс министрлігі елдегі автокөлік паркінің қазіргі жай-күйі мен оны жаңарту жоспарларына қатысты ресми түсінік берді. Ведомство мәліметінше, бүгінгі таңда республикадағы көліктердің жалпы саны 5,9 млн бірлікті құрап отыр, – деп хабарлайды 7-su.kz ақпараттық порталы Kazinform агенттігіне сілтеме жасап.
Автопарктің құрылымына үңілсек, пайдалану мерзімі 20 жылдан асқан көліктердің үлесі басым екені байқалады. Министрліктің Kazinform агенттігіне берген жауабында:
«Осы уақытқа дейін елдегі автокөліктер саны 5,9 млн-ды құрады: 399,5 мыңы – 3 жылға дейінгі, 1 миллионы – 3–7 жыл аралығындағы, 606,6 мыңы – 7–10 жыл аралығындағы, 1,4 миллионы – 10–20 жыл аралығындағы, 2,4 миллионы 20 жылдан асқан автокөліктер. Аталған жағдай Қазақстанда қолданыстағы автопаркті жаңартуға үлкен мүмкіндік бар екенін көрсетеді. Сонымен қатар, алда Қазақстандағы автопаркті кезең-кезеңімен жаңарту қарастырылып отыр. 2024 жылдан 2025 жылға дейін сатылым көлемі 15 пайызға өсті. Атап айтқанда, 2025 жылы 234,9 мың автокөлік сатылған. Ал 2024 жылы көрсеткіш 205,1 мың болған», – деп көрсетілген.
Отандық машина жасау саласындағы өндіріс қуатын арттыру мақсатында 2025 жылы екі бірдей жоғары технологиялық кәсіпорын іске қосылды. Алматы қаласында Chery, Haval және Changan брендтерін шығаратын «Astana Motors Manufacturing Kazakhstan» мультибрендті зауыты жұмысын бастады. Жылдық қуаты 120 мың автомобильді құрайтын кәсіпорын былтыр қыркүйектен бастап сериялық өндіріске көшті. Сонымен қатар Қостанай қаласында орналасқан «Kia Qazaqstan» зауыты ұсақ торапты өндіріс әдісімен жылына 70 мыңға дейін көлік шығаруды жоспарлап отыр.
Мемлекет тарапынан жасалып жатқан мұндай қадамдар ескірген көліктерді жаңа әрі қауіпсіз темір тұлпарларға алмастыруға бағытталған. Өндіріс көлемінің артуы мен жаңа зауыттардың ашылуы ішкі нарықты отандық өніммен қамтып қана қоймай, жаңа жұмыс орындарын құруға да мүмкіндік береді. Министрлік автопаркті жаңарту процесі алдағы жылдары да жүйелі түрде жалғасатынын растап отыр.
