Синоптиктер найзағай, бұршақ, қатты жел мен шаңды дауыл болатынын ескертті. Батыс аймақтарда аптап ыстық +40°С-қа дейін жетеді. Ал республиканың көп бөлігінде өрт қаупі өте жоғары деңгейде сақталуда. Бұл туралы «Қазгидромет» хабарлады.
Өңірлер бойынша ауа райы: аптап та, бұршақ та бар
Солтүстік және орталық өңірлер
(Ақмола, Солтүстік Қазақстан, Қостанай, Павлодар, Қарағанды, Ұлытау облыстары)
Бұл аймақтарда тұман түсіп, найзағай жарқылдап, екпінді жел соғуы ықтимал. Кей жерлерде бұршақ жаууы мүмкін. Өрт қаупі жоғары деңгейде сақталып отыр.
Шығыс аймақтар
(Абай, Шығыс Қазақстан облыстары)
Күн күркіреп, бұршақ түсуі ықтимал. Жел екпіні 25 м/с-қа дейін жетуі мүмкін. Кей жерлерде түнде тұман түсіп, күндіз шаңды дауыл тұрады. Өрт қаупі өте жоғары.
Оңтүстік және оңтүстік-шығыс өңірлер
(Алматы, Жетісу, Жамбыл, Түркістан, Қызылорда облыстары)
Найзағай ойнап, бұршақ жаууы және қатты жел соғуы ықтимал. Түркістан мен Қызылорда облыстарында шаңды дауыл болуы мүмкін. Өрт қаупі өте жоғары деңгейде сақталады.
Батыс өңірлер
(Ақтөбе, Батыс Қазақстан, Атырау, Маңғыстау облыстары)
Ауа температурасы +35…+40°C дейін көтерілмек. Кей жерлерде найзағай ойнап, бұршақ жаууы мүмкін. Сонымен қатар шаңды дауыл мен екпінді жел байқалуы ықтимал. Өрт қаупі бұл өңірлерде де өте жоғары.
