Қала күні қарсаңында талдықорғандық 43 отбасыға жаңа баспананың кілті табысталды. Салтанатты шараға қала әкімі Ернат Бәзіл қатысып, қуаныш иелерін құттықтады.
Халықты тұрғын үймен қамтамасыз ету Мемлекет басшысы айқындаған маңызды міндеттердің бірі екенін айтқан қала басшысы бұл бағыттағы жұмыстар жүйелі түрде жүзеге асып отырғанын жеткізді.
Жаңа қоныс иелеріне «Құлагер» шағынауданынан, «Береке» коттедж қалашығынан және «Жастар-3» тұрғын үй алабынан баспана кілттері табысталды.
Жетім бала есебінде 13 жылдан астам уақыт тұрғын үй кезегіне тұрған Элина Кибедова мен оның ұлдары Абдуллах, Ахмад және Халидтің енді өз баспанасы бар.
– Осы уақытқа дейін пәтер жалдап тұрдық. Қиналсақ та түбі өз шаңырағымыз болатынына сендік. Ел ағаларына аналық жүрегіммен алғыс айтамын. Әр қазақ баспаналы болсын, – дейді қала тұрғыны.
Қуанышты шараға балалары мен немерелерін ертіп келген Гүлнар Нүсіпова 15 жылға жуық уақыт кезекте тұрып, баспаналы болды.
– Біз осы күнді асыға күттік. Мемлекетке көрсетіп отырған ықыласы мен қамқорлығы үшін алғыс айтамын. Өзім үшін ғана емес, менімен бірге қоныстойын атап өтіп жатқан басқа жерлестерім үшін де қуаныштымын, – дейді ол.
Биыл қалада 177,6 мың шаршы метр тұрғын үйді пайдалануға беру жоспарланып отыр. Жақын арада «Бірлік» шағынауданында 170 пәтерге арналған екі кредиттік тұрғын үй халықтың игілігіне ұсынылады. Жыл соңына дейін «Ынтымақ» тұрғын үй алабында 200 пәтерлі 5 бес қабатты үйдің құрылысы аяқталмақ. «Жастар-3» тұрғын үй алабында 350 үйдің құрылысы жалғасып жатса, қаланың оңтүстік-батыс бөлігінде 641 пәтерлі тоғыз қабатты үй бой көтеруде.
Жалпы, жыл басынан бері бүгінгі қоныс иелерін қоса алғанда, қала бойынша 617 отбасы баспаналы болды. Жалпы, жыл соңына дейін Талдықорған қаласында 1500-ден астам отбасы қолжетімді тұрғын үймен қамтамасыз етіледі.
Еңлік КЕНЕБАЙ
